2019-ի կարեւոր միջազգային իրադարձությունները

Թե ինչպիսին էր 2019-ը Հայաստանի եւ հայաստանցիների համար մեզնից լավ գիտեն մեր ընթերցողները: Այդ իսկ պատճառով անդրադառնանք աշխարհում տեղի ունեցած կարեւոր իրադարձություններին, ոչ թե ամենակարեւորից՝ քիչ կարեւոր, այլ ըստ ժամանակագրությամբ:

Եւ այսպես, 2019-ին Վենեսուելայում երկիշխանություն հաստատվեց եւ այդպես էլ ներքաղաքական խնդիրը հանգուցալուծում չստացավ: Մակեդոնիան համաձայնեց փոխել երկրի պաշտոնական անվանումը ԵՄ-ին եւ ՆԱՏՕ-ին անդամակցելու համար: Մակեդոնիան վերածվեց Հյուսիսային Մակեդոնիայի, բայց ԵՄ-ն հրաժարվում է անդամակցության հարցով բանակցել այս փոքրիկ եւ աղքատ երկրի հետ:

Քաշմիրում իրավիճակն այնքան սրվեց, որ Պակիստանն ու Հնդկաստանը սպառնացին միջուկային զենքով: Եթե Քաշմիրում իրավիճակը վաղուց արդեն լարված է, ապա Նոր Զելանդիայում տեղի ունեցած ահաբեկչական գործողությունը, որի հետեւանքով զոհվեց 51 մարդ, ցնցեց ամբողջ աշխարհը: Ահաբեկիչը հարձակվել էր մահմեդականների վրա: 

Զարմացրեց նաեւ Ղազախստանի առաջնորդ Նուրսուլթան Նազարբաեւը՝ հրաժարվելով նախագահի պաշտոնից: Նա երկիրը ղեկավարում էր դեռ խորհրդային տարիներից: Ղազախստանն ի պատիվ Նազարբաեւի մայրաքաղաք Աստանան անվանակոչեց Նուր Սուլթան: 

Սուդանում ռազմական հեղաշրջում տեղի ունեցավ, որից հետո երկրի նախագահ ալ Բաշարը պաշտոնանկ արվեց եւ ձերբակալվեց: Նա էլ Նազարբաեւի նման երկիրը ղեկավարում էր 1989 թվականից:

Հիշարժան է նաեւ Փարիզի Աստվածամոր տաճարի խոշոր հրդեհը: Շրի Լանկայում տեղի ունեցավ հերթական ահաբեկչական գործողությունը, որի հետեւանքով զոհվեց 253 մարդ:   

Ճապոնիայի կայսրն էլ հրաժարվեց գահից եւ այդ երկրում սկսվեց Ռեյվա դարաշրջանը: Նարուհիտոն երկիրը ղեկավարում է մայիսի 1-ից:

Շերեմետեւոյի օդանավակայանում էլ հրդեհի հետեւանքով զոհվեց 41 մարդ: Չափից ավելի լարված էր իրավիճակը Պարսից ծոցում: Իրանի դեմ պատժամիջոցները վերսկսվեցին: Որոշակի ճնշում իր վրա զգաց նաեւ Քաթարը: Շարունակվեց քաղաքացիական պատերազմը Եմենում:

Հոնկոնգում երկար ժամանակ շարունակվեցին բողոքի բազմահազարանոց, ավելի ճիշտ միլիոնանոց գործողությունները: Հոնկոնգցիներին դուր չեկավ, որ ցանկանում էին Չինաստանի պահանջով կասկածյալներին կամ մեղադրյալներին հանձնել Պեկինին:

 Մեծ Բրիտանիան շարունակեց Եվրամիությունից դուրս գալու գործընթացը, որի շրջանակներում տեղի ունեցած արտահերթ ընտրություններից հետո վարչապետ դարձավ բորիս Ջոնսոնը, որը ԵՄ-ից անջատման վառ կողմնակիցներից է: 

Սիբիրի եւ Ամազոնի անտառները մեծապես տուժեցին շաբաթներ շարունակվող անտառային հրդեհներից:

Իրաքում բազմահազարանոց հանրահավաքներից հետո իշխանափոխություն տեղի ունեցավ, Սիրիան հերթական մասնատմանը ենթարկվեց, տարբեր ժամկետներով ազատազրկման դատապարտվեցին Կատալոնիայի նախկին ղեկավարները, որոնք ցանկանում էին երկրամասը անջատել Իսպանիայից: 

Չիլիում էլ անկարգություններ սկսվեցին, երբ իշխանությունները ցանկացան մետրոյով երթեեւկությունը 800-ից դարձնել 830 պեսո: Բողոքի գործողությունների ընթացքում զոհվեց մի քանի մարդ:

Սպանվեց Իսլամական պետություն կոչվող կազմակերպության առաջնորդը: Բոլիվիայի նախագահ Էվո Մորալեսն էլ զինվորականների ճնշմամբ հեռացավ երկրից եւ ապաստանեց Մեքսիկայում, իսկ այդ երկիրը մինչ օրս մնացել է առանց նախագահ:

Top-News.am