Հայաստանում վտանգված է ազատ խոսքը

Հիմա էլ հարձակման թիրախ դարձավ «Ժողովուրդ» օրաթերթը: Մթության քողի տակ խմբագրությունը ենթարկվել է հարձակման, տակնուվրա է արվել, փորձել են ինչ-որ փաստաթղթեր գտնել: Սա գողության փորձ չէ, սա հարձակում է ազատ խոսքի, ազատ մամուլի դեմ:

Yerevan.Today, «Հայելի», իսկ հիմա արդեն «Ժողովուրդ»: Հայաստանում ազատ խոսքը, ազատ մամուլը ենթարկվում է հարձակման եւ սա արդեն ավելի քան ակնհայտ է:

Երբ ձվեր նետեցին «Հայելու» խմբագրության վրա, երբ խուզարկվեց Yerevan.Today-ը, երբ աջուձախ պահանջում են փակել այս կամ այն ալիքը, հաղորդումը, եւ անգամ փակվում են հաղորդումներ, իսկ իշխանությունները, մեղմ ասած, լռում են, ապա մնում է արձանագրել՝ Հայաստանում ազատ խոսքը վտանգված է:

Մնում է հույս հայտնել, որ հանցագործները կբացահայտվեն, պատվիրատուները կբացահայտվեն, բայց լինենք անկեղծ՝ հույս ենք հայտնում, բայց հավատ, որ իրական պատվիրատուները եւ այս կեղտոտ գործողություններն իրականացնողները կհայտնաբերվեն՝ չկա:

Հայաստանի ժողովրդավարական հիմքերին եւս մեկ ծանր հարված  հասցվեց, եւս մեկ մարտահրավեր նետվեց երկրի ժողովրդավարական ուժերին: 

Top-News.am-ը դատապարտում է տեղի ունեցածը եւ պահանջում ժամ առաջ հայտնաբերել այս հանցագործության կազմակերպիչներին եւ իրականացնողներին:

Top-News.am