Ոչ մի բացահայտում էլ չի լինելու

Որքան ավելի երկար է շարունակվում ՀՀ երկրորդ նախագահ Ռոբերտ Քոչարյանի եւ նախկին այլ բարձրաստիճան պաշտոնյաների դատավարությունը, այնքան ավելի է հանրությունը համոզվում, որ մեղադրանքը սին է, գործն էլ փուչիկ։

Վստահաբար կարելի է ասել, որ շատ շուտով նաեւ նրանք, ովքեր դարձել էին պետական քարոզչամեքենայի, իսկ նախկինում ըննդիմադիր քարոզիչների զոհը, եւ հավատում էին, թե Ռոբերտ Քոչարյանը կրակելու հրաման է տվել, ովքեր հավատում են, որ այսօր Քոչարյանի դեմ այդ պատճառով է քրգործ հարուցվել, կհասկանան, որ իրենց, մեղմ ասած, խաբել են, դարձրել խաղալիք։

Հիմա էլ, պարբերաբար, քարոզիչները, որոնց թվում նաեւ փաստաբաններ, ժողովրդին հուզական վիճակում պահելու համար անդադար հայտարարում են՝ շուտով այնպիսի բաներ են պարզվելու, այնպիսի բաներ է բացահայտվելու։ Ժամանակն անցնում է, իսկ հանրության ավելի լայն խավեր համոզվում են, որ այս խոսքերի տակ դատարկություն է։

Իրականությունն այն է, որ ոչինչ էլ չի պարզվելու, ոչինչ էլ չի բացահայտվելու, քանի որ ոչ պարզելու, ոչ էլ բացահայտելու հարցեր եւ թեմաներ չկան։ Իսկ ավելի ճիշտ, պարզվելու եւ բացահայտվելու է, որ նման հայտարարություններ անողները պարզապես գիտակցաբար թյուրիմացության մեջ են գցել հանրությանը։

Իսկապես, եթե պարզելու, բացահայտելու բան լիներ, ապա այս մեկուկես տարին լիուլի հերիք էր բացահայտումները հրապարակելու համար։ Ավելին, եթե կար ինչ որ բան հրապարակելու, ապա անգամ կարիք չկար մեկուկես տարի սպասել, կարող էիք դա վաղուց անել։ Իսկ չեն անում, քանի որ հրապարակելու ոչինչ չունեն։ Կարճ ասած, ոչինչ էլ չի լինելու, ոչ մի բացահայտում էլ չի լինելու բացի մեկից, որ մեղադրանքները եւ քրգործը դատարկություն են։

Վարդան Մխիթարյան

Top-News.am