Մի քանի շատ կարեւոր հարց ՀՖՖ նախագահ Արթուր Վանեցյանին

Ֆուտբոլի Հայաստանի հավաքականը սեպտեմբերի 8-ին Վազգեն Սարգսյանի անվան հանրապետական մարզադաշտում հրաշալի խաղով տպավորիչ հաղթանակ տարավ Բոսնիա եւ Հերցեգովինայի հավաքականի նկատմամբ:

Ցավոք, որոշ մարդկանց անհասկանալի գործողությունների արդյունքում այդ օրը՝ խաղից անմիջապես առաջ տեղի ունեցան անընդունելի եւ դատապարտելի գործողություններ, որոնց հետեւանքով կոպտորեն խախտվեցին ֆուտբոլասերների ամենատարրական իրավունքները:

Այժմ մի քանի հարց ենք ուղղում ՀՖՖ նախագահ Արթուր Վանեցյանին, ակնկալելով նրա եւ ոչ թե ՀՖՖ նախագահի տեղակալի պատասխանը.

1. Ո՞վ եւ երբ է որոշել, որ մարզադաշտ չի կարելի մտնել արծվի ուրվագծերով ատրիբուտիկայով՝ շարֆերով, ցուցապաստառներով, դրոշներով: Ի դեպ, արծիվը պատկերված է Հայաստանի Հանրապետության զինանշանի վրա: 

2. Ո՞վ է իրավունք տվել «Արմոբիլ» անվտանգության ծառայության աշխատակիցներին վեց հոգով հարձակվել երկրպագուի վրա, նրան քաշքշել եւ խլել ցուցապաստառը, որի վրա որեւէ քաղաքական գրություն չի եղել, որեւ վիրավորական պատկեր չի եղել:

3. Ո՞վ է իրավունք տվել «Արմոբիլ» կազմակերպությանը խլել նրանց կողմից իրականացված բռնության տեսարանը նկարահանած դեռահաս երկրպագուի հեռախոսը եւ ջնջել տեսանյութը: Ո՞վ է պատասխանելու այս գործողությունների համար:

4. Ո՞վ է որոշում կայացրել մարզադաշտ չթողնել տոմս ունեցող ֆուտբոլասերների, միայն նրա համար, որ նրանց շարֆերը ինչ-որ մեկի դուրը չեն եկել:

5. Ո՞վ է «Արմոբիլ» կազմակերպության ղեկավարությանն իրավունք տվել համակենտրոնացման ճամբարի վերակացուի պահվածքով երկրպագուների վրա գոռալ եւ բղավել:

6. Ի՞նչ է շահելու հայկական ֆուտբոլը, եթե ճնշումների արդյունքում կազմաքանդվի մեր ակումբներին, հավաքականին անմնացորդ նվիրումով աջակցող «Ռեդ իգլզ» ֆան ակումբը:

Գեղամ Նազարյան

Top-News.am