Կոնսերվատորիան, աղբանոցը, Կարգին Հայկոն

Հայկ Մարությանը, որը Նիկոլ Փաշինյանի գերակտիվ միջամտությամբ դարձավ երեք հազարամյա Երեւանի քաղաքապետ, ընտրություններից առաջ խոստանում էր նաեւ մաքրել: Պարզվեց, որ նա մտադիր էր ոչ թե քաղաքը մաքրել, այլ դադարեցնել «Սանիթեքի» աշխատանքը:

Հիմա Երեւանը կեղտի մեջ կորած է: Ամենուր բուրում է աղբի անուշահոտը: Երեւանցիները երջանիկ են: Լինելով մշակութային հին ազգ, երեւանցիները չէին կարող աղբով չզարդարել նաեւ Պետական կոնսերվատորիայի հարակից տարածքը: Այս լուսանկարներն արվել են կոնսերվատորիայի պատի տակ:

Զբոսաշրջիկները քայլելով քաղաքի կենտրոնում, տեսնելով աղբը, այդ թվում կոնսերվատորիայի պատերի տակ թափված աղբը հասկանում եւ գնահատում են մեր կառավարության գործադրած ջանքերը:

«Իմ քայլը» հիմնադրամով դասական երաժշտություն եք պրոպագանդում: Լավ եք անում, բայց աղբով լեցուն քաղաքում դասական երաժշտության համերգների կազմակերպումը բաց երկնքի տակ հիշեցնում է՝ խնջույք ժանդախտի ժամանակ արտահայտությունը:

Այս իշխանություննները, կառավարությունը, քաղաքապետարանն այդպես էլ չհասկացան, որ համաշխարհային փորձը վաղուց արդեն ապացուցել է, որ աղբահանությամբ պետք է զբաղվի մասնավոր կազմակերպությունը կամ կազմակերպությունները: Պետական համակարգը այս արցով չի կարող արդյունավետ աշխատել, այն էլ Հայաստանի նման աղքատ երկրներում:

Քաղաքը կորած է աղբի մեջ, եւ այս հարցը, չնայած բազմաթիվ եւ անդադար խոստումներին չի լուծվելու, քանի դեռ Կարգին Հայկոն համառում է, որ աղբի գործն ինքը պետք է անի:

Այնպես որ, Երեւանի ավագանու արտահերթ ընտրություններն ու նոր քաղաքապետի ընտրությունն արդեն երեւանցիների պատվի հարցն է: Հանդուրժել այս ամենը կնշանակի ընդունել, որ մենք աղբ սիրող եւ աղբի հետ նորմալ համակեցություն հաստատած քաղաքաբնակներ ենք:

Աննա Բաղդասարյան

Top-News.am