Ռուսաստանն ու ԱՄՆ-ն համաձայնել են, որ Սիրիայի դեմ հարվածն այլևս չպետք է կրկնվի. Լավրով

Ռուսաստանի Դաշնությունն ու Միացյալ Նահանգները համաձայնության են եկել այն հարցում, որ ապրիլի 6-ի գիշերն ԱՄՆ կողմից Սիրիայի տարածքում իրականացված ավիահարվածը չպետք է կրկնվի:

Ինչպես նշում է Al Arabiya-ն, այս մասին ՌԴ արտաքին քաղաքական գերատեսչության ղեկավար Սերգեյ Լավրովն ասել է իր սիրիացի գործընկեր Վալիդ ալ Մուալեմի հետ հանդիպման ժամանակ:

Լավրովը մանրամասնել է, որ ինքն այս մասին խոսել է պաշտոնական այցով Մոսկվա ժամանած ԱՄՆ պետքարտուղար Ռեքս Թիլերսոնի հետ:

«Պետքարտուղարը բացատրել է, որ իրականացված ավիահարձակումից հետո ԱՄՆ իշխանություններն այժմ հստակ թիրախներ չունեն Սիրիայում: Այնուհանդերձ՝ նա չբացառեց, որ ապագայում կարող է ինչ-որ բան տեղի ունենալ»,-ավելի ուշ հայտարարել է Պետդեպի խոսնակ Մարկ Թոները:

Հիշեցնենք, որ Միացյալ Նահանգներն ապրիլի 6-ի երեկոյան թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային, ինչն արվել է օրեր առաջ Իդլիբում սիրիացի զինվորականների կողմից քիմիական զենքի կիրառմանն ի պատասխան:

Հաղորդվում է, որ ԱՄՆ-ն արձակել է «Տոմահավկ» տեսակի 59 հրթիռ, որոնք արձակվել են «Շայրաթ» ռազմաբազայի ուղղությամբ, որտեղից ավելի վաղ իրականացվել էր քիմիական հարձակումը:

ԱՄՆ նախագահ Դոնալդ Թրամփը, մեկնաբանելով Սիրիայի տարածքում իրականացված հրթիռային հարձակումը, նշել էր, որ «դա բխում էր ԱՄՆ ազգային անվտանգության կենսական շահերից»։

tert.am