Հայաստանի եւ Ադրբեջանի մեկ օրը կամ սաստիկ շոգերին սպասելիս

Ասա, ինչ է իրադարձություններ են կատարվում երկրում, ասեմ` ինչ պետությունում ես ապրում դու: Փորձենք տեսնել, թե հունիսի 3-ին ինչով էին ապրում Հայաստանում եւ մեր հարեւան երկրում՝ Ադրբեջանում:

Հայաստանում մի խումբ ցուցարարներ պահանջում էին խորհրդարանականներից, որ տուրք չգանձեն ներկրվող ցեմենտից: Բնականաբար, պատգամավորները նրանց չլսեցին:

Ադրբեջանցիներն օրը սկսեցին լուրով, թե միջազգային փորձագետները համոզված են, որ Ադրբեջանն առաջիկայում կավելացնի նավթի արդյունահանումը: Իսկ ահա հայաստանցիներին հայտնի դարձավ, որ շոգերը սովորականից շատ ավելի շուտ են սկսվելու:

Ավտովթարների առումով Հայաստանն ու Ադրբեջանը միմյանցից հետ չմնացին: Երեւանում ինչ-որ մեկը հաջողացրել էր ավտոմեքենան մխրճել պատի մեջ եւ փլուզել այն, իսկ Ադրբեջանում, Մասազիրում վթարի հետեւանքով զոհեր են եղել:

Ադրբեջանում այսօր արծաթն ու ոսկին թանկացան, իսկ Հայաստանում իմացան, որ «Արմենիա Էյրվեյզը» հունիսի 15-ից սկսում է Երեւան-Թեհրան-Երեւան կանոնավոր չվերթները:

Պաշտոնական Բաքուն վաղ առավոտյան հայտնեց, թե իբր հայկական կողմը գիշերը խախտել է հրադադարի ռեժիմը եւ գնդակոծել ադրբեջանական դիրքերն ու բնակավայրերը: Հայկական կողմը գնդակոծությունների մասին ոչինչ չի հայտնել:

Հայաստանում գտել են այն մորը, որը նորածին երեխային նետել է ջրանցքի մեջ: Նա ասել է, թե իբր երեխան մահացած է ծնվել: Ի դեպ, այս լուրը շտապել են հայտնել նաեւ ադրբեջանական լրատվամիջոցները: Իսկ ադրբեջանական Սումգայիթում ավտոբուս է հրդեհվել:

Ադրբեջանի նախագահ Իլհամ Ալիեւն այսօր ընդունել է հարավային Կովկասի հարցերով ԵՄ հատուկ ներկայացուցչին, ինչպես նաեւ Համաշխարհային բանկի պատվիրակությանը: Հայաստանի վարչապետը նրանց հետ չի հանդիպել, քանի որ արձակուրդում է:

Հայաստանում քննարկում են իմքայլական պատգամավոր Եղոյանի ռեստորանային վեճը, իսկ հարեւան երկրում անսովոր ավտովթարը, բայց ոչ պատգամավորի մասնակցությամբ: 

Իսկ թե ինչու է Նիկոլ Փաշինյանը երկարացրել արձակուրդը, եւ ինչպես է երկիրը ղեկավարելու Ավինյանը, հանրությունն առանձնապես չի քննարկում: Ադրբեջանցիներն էլ առանձնապես չեն քննարկում պատգամավորներից մեկի հայտարարությունը, թե աշխարհն ընդունում է, որ Ադրբեջանը տարածաշրջանային առաջատար է:

Մինչ անձրեւներից հետո թունավոր նյութերը հոսում են Կապանով եւ լցվում Ողջի գետը, Ազգային ժողովը օրինագծեր էր ընդունում, իսկ այդ ընթացքում Ադրբեջանում մի շարք ավտովթարներ տեղի ունեցան, որի պատճառով զոհվեցին մարդիկ: Վթարի է ենթարկվել նաեւ հայտնի ադրբեջանցի երգչուհու դուստրը:

Հայաստանում շարունակում են գործ հարուցել նախկին ու ներկա գյուղապետերի նկատմամբ: Հերթը հասավ Կարճեւանի գյուղապետին: Նա հողերը խախտումներով է օտարել: Ադրբեջանում էլ ազատ են արձակել նրան, որին կալանավորել էին բազմահարկերի հրդեհից հետո:

Երեւանում մի մարդ պաշտպանության նախարարության մոտ սպառնում էր ինքնահրկիզվել, իսկ մի խումբ մարդիկ շրջափակել էին սորոսականների գրասենյակը: Ադրբեջանում էլ հայտնեցին, որ ավտոկայարաններն անցնում են խիստ ռեժիմի աշխատանքի:

Իլհամ Ալիեւը հեռախոսազրույց է ունեցել ՌԴ նախագահ Վլադիմիր Պուտինի հետ, իսկ Նիկոլ Փաշինյանը՝ ոչ, քանի որ գտնվում է արձակուրդում, փոխարենը մի «դուխով» գործարար ներխուժել է երեւանյան բակերից մեկը, փորձել ապամոնտաժել պոմպակայանը եւ տեղում գարեջրատուն կառուցել: Ոստիկանները շտապել են հակահեղափոխական բնակիչներից պաշտպանել հեղափոխական գործարարին:

Հայաստանում ԱԺ փոխխոսնակը սպասում է, որ իրենից ներողություն խնդրի Դանիել Իոնիսյանը, բայց քչերն են հավատում, որ այն կլսվի: Իսկ Ադրբեջանում ադրբեջանցիներին համոզում են, որ նրանք հրաժարվում են դոլարներից:

Ադրբեջանում ուրախությամբ հայտնում են, որ պատանի ադրբեջանցի ըմբիշը հաղթել է պատանի հայ ըմբիշին: Ինչպես տեսնում եք, այս առումով երկու հասարակությունները միմյանց շատ նման են: 

Հայաստանցիներն այսուհետ կարող են հանգիստ ապրել. հաստատվել է Սփյուռքի հանձնակատարի գրասենյակի կանոնադրությունը, իսկ ադրբեջանցիները կարող են հպարտանալ, որ Ադրբեջանում աշխատելու է սոցծառայության հարյուրավոր գրասենյակներ:

Ադրբեջանում վաճառքի է հանվել «Չինար» սառնարանների գործարանի Շամքորի մասնաճյուղը: Հայաստանում նման գործարան վաճառքի չի հանվել, փոխարենը պատգամավորները ցանկանում են փոխհատուցումից զրկել մարտի մեկին տուժած ոստիկաններին: Հավանորեն, նրանց համոզմամբ երկիրն այդպես ավելի լավ կզարգանա:

Այսպիսին էր Հայաստանի եւ Ադրբեջանի մեկ օրը: 

Վարդան Մխիթարյան

Top-News.am