Կոնգրեսական Դեյվ Թրոթ. Ժամանակն է, որ ԱՄՆ-ը Հայոց ցեղասպանությունը ճանաչի

Շատ երկրներ, այդ թվում՝ Միացյալ Նահանգները, հրաժարվել են ճանաչել հայ ժողովրդի դեմ իրականացված Ցեղասպանությունը: Կոնգրեսական Դեյվ Թրոթն այս մասին նշել է Armenian Weekly կայքում հրապարակված իր հոդվածում:

Հոդվածում Թրոթը նշել է, որ ինքը ներկայացնում է «ուժեղ եւ աչքի ընկնող» հայ համայնքի շահերը: «Կոնգրեսում ընտրվելու իմ առաջին ժամկետի ժամանակ ես Հայաստան ուղեւորվելու հնարավորւթյուն ստացա՝ նշելու Հայոց ցեղասպանության 100-ամյա տարելիցը: Հարյուրամյակը նշելու արարողությունը հանդիսավոր հիշոցում էր 1,5 միլիոն հայերի հոգեցունց սպանության մասին, որը սկսվել է 1915 թվականին, երբ Օսմանյան Թուրքիայի իշխանությունները հայ ժողովրդի դեմ թիրախավորված հարձակում են սկսել նրան բնաջնջելու փորձ կատարելով»,- հայտարարել է Թրոթը:

Նրա խոսքով՝ համակարգված արշավի ընթացքում Օսմանյան կայսրությունը մտադիր էր ոչ միայն հայերին բնաջնջել, այլեւ բռնագրավել եւ ոչնչացնել նրանց եկեղեցիները եւ հուշարձանները՝ ամբողջովին ոչնչացնելով հայ ժողովրդի եւ նրա մշակույթի հիշատակը:

Կոնգրեսականը նշել է, թե ժամանակն է, որ Միացյալ Նահանգները ճանաչի պատմության այդ սեւ ժամանակաշրջանը: «Այս ամիս ես բանաձեւ եմ ներկայացրել, որում վերջապես ճանաչվում են այդ վայրագությունները եւ Միացյալ Նահանգների կառավարությանը կոչ է պարունակվում որպես հայ ժողովրդին համերաշխություն պաշտոնապես ճանաչել Ցեղասպանությունը, որը տեղի է ունեցել ավելի քան 100 տարի առաջ»,- հայտարարել է նա:

Թրոթն իր հոդվածում նաեւ նշել է, որ Հայաստանը մեծ թվով աշխարհաքաղաքական խնդիրների է բախվում եւ Թուրքիայի ու Ադրբեջանի կողմից տնտեսական շրջափակման մեջ է: Նա ընդգծել է, որ իր գործընկերներ Էդ Ռոյսի եւ Էլիոթ Էնգելի հետ կոչ են արել մի շարք առաջարկներ իրականացնել, որոնք թույլ կտային տարածաշրջանում ագրեսիան նվազեցնել:

«Ըստ այն հանգամանքի, թե ինչպես է կազմավորվել Թրամփի վարչակազմը՝ ինձ հաճելի էր լսել, որ պետքարտուղար Թիլերսոնը Լեռնային Ղարաբաղի հակամարտությունը ճանաչում է որպես «տարածաշրջանի կայունությանը եւ ԱՄՆ-ի ազգային անվտանգության շահերին սպառնալիք», եւ ես կաջակցեմ այս հակամարտության մեջ մեծ դերակատարում ուևնենալու վարչակազմի ցանկացած փորձ»,- նշել է նա՝ հույս հայտնելով, որ Ադրբեջանը իր ագրեսիայի համար պատասխանատվության կենթարկվի:

«Մոտենալով Հայոց ցեղասպանության 102-րդ տարելիցին՝ վաղուց ժամանակն է ճանաչել, որ մենք ոչ միայն չենք ընդունում անցյալում հայերի դեմ ուղղված բռնությունը, այլեւ հաստատում ենք հայ ժողովրդի հետ մեր համերաշխությունը, քանի որ նրանք շարունակում են իրենց եւ իրենց վառ մշակույթը պաշտպանել դեռեւս ավելի անկայուն տարածաշրջանում»,- ամփոփել է նա:

news.am

Այս թեմայով «Ադրբեջանցին Հադրութում հայ ծերունու է գլխատել, դա սովորական պատերազմական հանցագործություն չէ»․ Սիրանուշ Սահակյան Հայաստանում ԵՄ պատվիրակությունը՝ Հայոց ցեղասպանության մասին. Այդ հանցագործությունները երբեք չեն մոռացվի Հոգեւորականների ուղեկցությամբ Ծիծեռնակաբերդի հուշահամալիր այցելեց Գարեգին Բ-ն. Հնչեց Հայր մերը Հիշում ենք եւ պաշտպանում․ ՊՆ խոսնակ Հայոց ցեղասպանության 105-րդ տարելիցն է. բարձրաստիճան պաշտոնյաներն այցելում են Ծիծեռնակաբերդ (տեսանյութ)