Լազարևը «Եվրատեսիլի» շեմին բժշկական օգնության կարիք է ունեցել
Ռուսական էստրադայի հայտնի երգիչ Սերգեյ Լազարևը, ով այս տարի Ռուսաստանը կներկայացնի «Եվրատեսիլ-2019» երգի մրցույթում, ստիպված է եղել օգնություն խնդրել Իսրայելի բժիշկներից:
Ինչպես հայտնում է Gazeta.ru-ն, երգիչը պարանոցի հատվածում ցավեր է ունեցել: Ցավն այնքան անտանելի է դարձել, որ, աղբյուրի հավաստմամբ, «նա չի կարողացել անգամ գլուխը բարձից վեր բարձրացնել» և ստիպված է եղել հիվանդանոց գնալ:
«Քայլում եմ շարֆով, թաքցնում եմ կոկորդս, բայց դա չի փրկում: Պարանոցս ցավում է, ինչպես երևում է, ինչ-որ տեղ օդորակիչից չեմ խուսափել: Հիմա մարմինս մեծ դժվարությամբ եմ մի ուղղությամբ թեքում»,- ասել է Լազարևը` հույս հայտնելով, որ մինչ «Եվրատեսիլի» կիսաեզրափակիչ փուլի իր մրցելույթն առողջական խնդիրներ չի ունենա:
Հիշեցնենք, որ առաջին կիսաեզրափակիչն արդեն ավարտվել է: Լազարևը ելույթ կունենա մայիսի 16-ին կայանալիք երկրորդ կիսաեզրափակչում` երկրորդ համարի ներքո: Նույն օրը, առաջին համարի ներքո, հանդես կգա Հայաստանի ներկայացուցիչ Սրբուկը: