Այդ խաչակիր դաշինքն իր դեմքը ցույց տվեց. Էրդողանին վրդովվեցրել է ԵՄ երկրների ղեկավարների հանդիպումը Հռոմի պապի հետ

Թուրքիայի նախագահ Ռեջեփ Թայիփ Էրդողանը «խաչակիր դաշինք» է անվանել Եվրամիության անդամ երկրներին և հայտարարել, որ Թուրքիային ԵՄ չեն ընդունում կրոնական խտրականության պատճառով, գրում է թուրքական «Անադոլու» գործակալությունը:

Էրդողանին, մասնավորապես, վրդովվեցրել է ԵՄ անդամ երկրների ղեկավարների հանդիպումը Հռոմի պապի հետ։

«ԵՄ անդամ երկրների ղեկավարները հանդիպել են Վատիկանում: Սա ի՞նչ է նշանակում, այդ ինչո՞ւ հենց Վատիկանում: Հռոմի պապն այդ երբվանի՞ց է ԵՄ անդամ: Այդ խաչակիր դաշինքն ի վերջո իր դեմքը ցույց տվեց: Թուրքիային թույլ չեն տալիս մտնել ԵՄ, քանի որ մահմեդական ենք», - հայտարարել է Էրդողանը:

Հիշեցնենք, որ մարտի 25-ին Հռոմի Ֆրանցիսկոս պապն ընդունել է Եվրամիության անդամ երկրների ղեկավարների պատվիրակությանը, որոնք Հռոմ են ժամանել Եվրամիության կազմավորման հիմքը դրած Հռոմի պատմական համաձայնագրի 60-ամյակի առիթով: Նույն օրը հռոմեական Կապիտոլիումում մեկնարկել է Եվրոպական միության անդամ 27 երկրների (առանց Մեծ Բրիտանիայի) ղեկավարների հանդիպումը` նվիրված Մարդկանց, ապրանքների, ծառայությունների և կապիտալի ազատ տեղաշարժի մասին հռոմեական համաձայնագրի 60-ամյակին:

tert.am