Վուդի Ալենը 68 մլն դոլարի հայց է ներկայացրել Amazon-ի դեմ

Հոլիվուդի ամենահայտնի ռեժիսորներից մեկը՝ Վուդի Ալենը, 68 մլն դոլարի հայց է ներկայացրել ամերիկյան Amazon ինտերնետ ընկերության դեմ՝ պնդելով, որ դրան պատկանող կինոստուդիան առանց հիմնավոր պատճառի չեղարկել է 2016թ. իր հետ կնքած պայմանագիրը:

Ինչպես նշում է The Guardian-ը, Ալենի վերջին ֆիլմը («Անձրևոտ օր Նյու Յորքում») հեռացվել է Amazon-ի տեսավարձույթից՝ չնայած, որ պայմանագրի համաձայն՝ ընկերությունը պարտավոր էր այն թողարկել:

Աղբյուրը նկատում է, որ Amazon-ը պայմանագիրը չեղարկել է 83-ամյա ռեժիսորի դստեր՝ Դիլան Ֆերոուի կողմից հոր դեմ սեռական բռնության գործով մեղադրանքների պատճառով:

Ալենի ներկայացրած հայցում նշվում է, որ Amazon-ը պայմանագիրը խախտելու համար հիմք է ընդունել «25 տարվա վաղեմության անհիմն» մեղադրանքը: Ռեժիսորն ընդգծել է, որ Amazon-ը նախքան պայմանագրի ստորագրումն իմացել է այդ մեղադրանքի մասին: