Հայաստանի առաջնությունը գնաց արձակուրդ

Հայաստանի ֆուտբոլի առաջնությունում սկսվեց ձմեռային արձակուրդը: Թիմերը պետք է պատրաստվեն առաջնության հաջորդ փուլին: Իսկ ինչպե՞ս ավարտեցին մեր ակումբներն այս փուլը:

Աղյուսակը բավական հետաքրքիր եւ միաժամանակ տարօրինակ տեսք ունի: Երկար ընդմիջումից հետո վերջապես մեր առաջնությանը մասնակցում է ոչ թե վեց, այլ ինը թիմ, որոնք գրեթե միմյանց հավասար են եւ ներուժով եւ իրական խաղամակարդակով:

Երկար ժամանակ բոլորի համար անսպասելի առաջատարը Վանաձորի «Լոռին» էր, հետո այս թիմը սկսեց վատ խաղալ եւ հիմա 25 միավորով ընդամենը 5-րդ տեղում է:

Սպասելիքները մեծ էին «Փյունիկից» եւ «Ալաշկերտից», բայց նրանք սպասված խաղը չեն ցուցադրում: Օրինակ, վերջին տուրում առաջին տուրում գտնվող «Ալաշկերտը» գրեթե մեկ խաղակես ունենալով թվային առավելություն, 1:0 հաշվով պարտվեց հետնապահ «Արարատից», որից պարտվեց նաեւ «Փյունիկը», որը ունի 27 միավոր եւ արդեն 5 միավորով հետ է մնում առաջատար «Ալաշկերտից»:

«Փյունիկում» մթնոլորտն այն չէ: Թիմը կարծես խաղադաշտ է դուրս գալիս պարտվելու համար: Լուրեր են պտտվում, որ թիմի ֆուտբոլիստները դժգոհ են գլխավոր մարզիչ Տալալաեւի կոշտ ոճից եւ խիստ տոնից:

Սպասվածից շատ ավելի թույլ տպավորություն է թողնում «Արարատ Արմենիան»: Այս թիմը 26 միավորով ընդամենը 4-րդն է:

Իսկ ահա «Բանանցի» հաջող խաղը (2-րդ տեղ) անակնկալ էր շատերի համար: «Բանանցը» առաջատարին զիջում է ընդամենը չորս միավորով:

Աբրահամ Խաշմանյանի թիմում հայտնվելուց հետո կտրուկ լավացրել է խաղը հետնապահ «Արարատը», որը հաջողացրեց հաղթել «Փյունիկին» եւ «Ալաշկերտին» եւ այժմ արդեն նախավերջին տեղում է, վերջին տեղը թողնելով բոլորից ակնհայտորեն թույլ «Արցախին»:

Վերջին խաղերում լավ տպավորություն թողեց «Գանձասար-Կապանը», որը բավական գրագետ խաղով հաղթեց ինչպես «Արարատին», այնպես էլ «Փյունիկին»: Եթե թիմը ցուցադրի նույն մակարդակի ֆուտբոլ, ապա կարող է լուրջ պայքար մղել առաջին երեք տեղերի համար:

Ընդհանուր առմամբ ակումբային ֆուտբոլը Հայաստանում դեռ շատ թույլ է, բայց գրագետ աշխատանքի եւ համապատասխան ֆինանսների առկայության դեպքում առաջընթացը տեսանելի է:

Top-News.am