Հայաստանում «կենդանի» կենտրոն ենք ստեղծելու՝ դեպի Արարատ բացվող տեսարանով. Նիկոլյա Ազնավուր

Աշխարհահռչակ շանսոնյե Շառլ Ազնավուրի որդին, «Ազնավուր» բարեգործական հիմնադրամի համահիմնադիր Նիկոլյան «ՌուսԱրմԻնֆո» գործակալությանը տված հարցազրույցում պատմել է հիմնադրամի գործունեության և Երևանում Ազնավուրի անվան կենտրոնի ստեղծման ծրագրերի մասին:

Նրա խոսքով՝ 2017-ին ստեղծված հիմնադրամը կշարունակի իրագործել բոլոր հիմնական նախագծերը, որոնք շանսոնյեի նախաձեռնությամբ իրականացվում էին 1988-ի երկրաշարժից հետո: Դրանց թվում են սոցիալական նշանակություն ունեցող նախագծերը Գյումրիում, կրթական ծրագրերը և մշակութալուսավորչական նախաձեռնությունները:

Գլխավոր նախագիծը լինելու է Ազնավուրի կենտրոնի ստեղծումը Երևանի «Կասկադ» համալիրի գագաթին: «Որոշ ժամանակ շենքը դատարկ է մնացել: Հորս ժամանակ էր պետք հայեցակարգը մշակելու համար, մենք երկու տարի աշխատել ենք դրա ուղղությամբ: Նա ինքը դեմ էր թանգարանի գաղափարին և ցանկանում էր կենդանի մի վայր ստեղծել, որտեղ բոլորն աշխատանքով կզբաղված կլինեն», - ընդգծել է Նիկոլյա Ազնավուրը:

Նրա խոսքով՝ Ազնավուրի կենտրոնում թանգարանային հատվածը նվիրված կլինի արտիստի կյանքին և մշակութային ժառանգությանը: Ընտանիքը կենտրոնին կնվիրի մաեստրոյի դաշնամուրը, նրա ձայնագրությունները և անձնական իրերը:

Կենտրոնի տարածքում կստեղծվի իր տեսակի մեջ առաջին ֆրանսիական ինստիտուտը տարածաշրջանում՝ մեդիադարանով, ցուցասրահով, կինոսրահով և հանգստյան գոտիով:

«Միտքն այն է, որ այստեղ կարելի է ժամանակ անցկացնել մեդիադարանում՝ գիրք կարդալ, ֆիլմ նայել, այցելել թանգարանային հատված՝ հորս կյանքի մասին ավելին իմանալու համար, սուրճ ըմպել՝ դեպի Արարատ բացվող տեսարանի ներքո», - ասել է Նիկոլյան: 

Շանսոնյեի որդին նշել է, որ ինստիտուտի կրթական ծրագիրը համապատասխանելու է միջազգային չափանիշներին, իսկ տրամադրված վկայականները կընդունվեն Ֆրանսիայի կողմից:

Հիշեցնենք, որ օրեր առաջ Շվեյցարիայում մեծացած Նիկոլյան ևս մեկ հարցազրույց էր տվել՝ հայտնելով, որ պատրաստվում է հայերեն սովորել և մտադիր է մշտական բնակություն հաստատել Հայաստանում:

Այս թեմայով «Երկու լեգենդ». Ազնավուրի դուստրը հրապարակել է շանսոնյեի և նախօրեին կյանքից հեռացած լեգենդար դերասան Քըրք Դուգլասի լուսանկարը «Դու կարող ես մերսել, ինչպես քեզ սովորեցրել եմ». ինչպես է փոքրիկ Ռաֆիկը մերսում Ազնավուրին Շառլ Ազնավուրի դուստրն ընտանիքի առօրյայից տեսանյութ է հրապարակել (տեսանյութ) Նրա ձայնը որևէ մեկի հետ չես շփոթի. ռուսական «Առաջին ալիքի» անդրադարձը Շառլ Ազնավուրի կյանքին ու գործունեությանը Կոչ եմ անում բոլորին այստեղ գալ ոչ միայն Ցեղասպանության օրը, կոչ եմ անում Հայաստանը դարձնել ավելի բարգավաճ. Նիկոլա Ազնավուր