ԵԽԽՎ-ն կոչ է արել Թուրքիային ամենաուշը մինչև 2018թ. վերացնել երկրում արտակարգ դրության ռեժիմը

Եվրոպայի խորհրդի խորհրդարանական վեհաժողովը նոր զեկույց է հրապարակել Թուրքիայում ժողովրդավարության ու մամուլի ազատության վիճակի վերաբերյալ:

Ինչպես հայտնում է թուրքական diken.com.tr կայքը` ԵԽԽՎ-ն կոչ է արել Թուրքիային ամենաուշը մինչև 2018թ. վերացնել երկրում արտակագ դրությունն ու վերջ տալ Նախարարների խորհրդի որոշումների միջոցով իրականացվող լայնածավալ կադրային զտումներին:

Զեկույցը նաև ուշադրություն է հրավիրում այն փաստի վրա, որ Թուրքիայի խորհրդարանի 154 պատգամավոր մինչ այժմ զրկված է իր անձեռնմխելիությունից, իսկ քրդամետ 13 պատգամավոր դեռևս անազատության մեջ է և չի կարողանում իրականացնել նախընտրական քարոզարշավը:

Վեհաժողովը կոչ է հղել Թուրքիային վերանայել խոսքի ազատության վերաբերյալ մոտեցումներն ու հնարավորինս բացառել ընդդիմադիր մամուլի հանդեպ տարատեսակ ճնշումները, ինչպես նաև ջանք չխնայել ապրիլի 16-ին կայանալիք սահմանադրական փոփոխությունների վերաբերյալ հանրաքվեն ժողովրդավարական նորմերին համապաստախան անցկացնելու համար: Թուրքիային կոչ է արվել նաև հաշվի առնել Եվրոպայի խորհրդի Վենետիկի հանձնաժողովի առաջարկները:

Հիշեցնենք, որ Եվրոպայի խորհրդի Վենետիկի հանձնաժողովն օրեր առաջ հայտարարել էր, որ Թուրքիայում սահմանադրական փոփոխությունների հարցով հանրաքվեն անհրաժեշտ է հետաձգել մինչև երկրում սահմանված արտակարգ դրության ռեժիմի ավարտը, կամ էլ այդ ընթացքում հարկ է նվազեցնել ընդդիմադիր գործիչների հանդեպ կիրառվող ճնշումներն ու սահմանափակումները:

Հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին:18 հոդվածից բաղկացած օրենքի ընդունմանը կողմ է քվեարկել 339 պատգամավոր: Սահմանադրական փոփոխությունների հարցով հանրաքվեն կանցկացվի ապրիլի 16-ին։

tert.am