Տղամարդկանց հավաքականը հաղթեց Հնդկաստանին, կանանց հավաքականը՝ Իրանին

Վրաստանում ավարտին է մոտենում շախմատի համախարհային օլիմպիադան: Մնացել է ընդամենը երկու տուր:

Մինչ իններորդ տուրի արդյունքներին անդրադառնալը նշենք, որ կազմակերպիչների սխալի պատճառով տեղեկություն էր տարածվել, թե ութերորդ տուրում Հայաստանի հավաքականը պարտվել է Լեհաստանին, բայց իրականում խաղն ավարտվել էր 2:2 հաշվով:

Իսկ այսօր Հայաստանի հավաքականը կարեւոր հաղթանակ տարավ Հնդակաստանի նկատմամբ: Միակ հաղթանակը տարավ Հայկ Մարտիրոսյանը: Մյուս երեք խաղերն ավարտվեցին ոչ-ոքի:

Հայաստանի հավաքականը ԱՄՆ-ի, Չինաստանի եւ Անգլիայի հավաքականների հետ կիսում է երկրորդ տեղը, իսկ առաջին տեղում Լեհաստանի ընտրանին է, որը հետապնդող քառյակից առաջ է ընդամենը մեկ միավորով:

Տասներորդ տուրում Հայաստանը կմրցի ԱՄՆ-ի հետ, Չինաստանը՝ Լեհաստանի, իսկ Ռուսաստանը՝ Անգլիայի:

Իններորդ տուրում կարեւոր հաղթանակ տարավ Հայաստանի կանանց հավաքականը՝ 3:1 հաշվով հաղթելով Իրանին:

Էլինա Դանիելյանն ու Լիլիթ Մկրտչյանը հաղթանակներ տարան, իսկ Աննա Սարգսյանն ու Սիրանուշ Ղուկասյանը ոչ ոքի խաղացին:

Այժմ Հայաստանի հավաքականը վաստակել է 15 միավոր եւ երրորդ տեղում է, մեկ միավորով հետ մնալով առաջատար Չինաստանին:

Տասներորդ տուրում Հայաստանի հավաքականը կմրցի Ադրբեջանի հետ եւ հաղթանակի դեպքում մեծ հնարավորություն կունենա զբաղեցնել առնվազն երրորդ տեղը:

Top-News.am