Երբ շուրջօրյա ցնորքի մեջ լսվում է բանականության ձայնը

Սեպտեմբերի 11-ին ՀՔԾ պետ Սասուն Խաչատրյանը հանդես եկավ հերթական սենսացիոն հայտարարությամբ: Նա վերցրեց եւ հայտարարեց, թե 2008թ. մարտի 1-ին բանակը կրակել է Երեւանի բնակելի շենքերի վրա, եւ որ բանակի ներգրավվածությունը հանգեցրել է պաշտպանական դիրքերի թուլացմանը:

Նախ մտահոգիչ է, որ ՀՔԾ պետը կրկին անգամ կասկածը ներկայացնում է որպես ապացուցված մեղադրանք, բացի այդ, մտորումների տեղիք է տալիս բանակին վարկաբեկելու ՀՔԾ-ի անդադար փորձերը:

Այսօր ՀՔԾ պետի սկանդալային հայտարարությանը ստիպված անդրադարձել է ՀՀ զինված ուժերի գլխավոր շտաբի պետ Արտակ Դավթյանը, որը մարտի 1-ի դեպքերի ժամանակ եղել է Գլխավոր շտաբի օպերատիվ վարչության պետը:  

«2008 թ. մարտի 1-ի դեպքերի ժամանակ առաջնագիծը նոսրացած չի եղել, առաջնագծում ընթացել է սովորական մարտական աշխատանք»,- այսօր լրագրողների հետ հանդիպման ժամանակ հայտարարել է Արտակ Դավթյանը:

«Ես՝ որպես օպերատիվ վարչության պետ, նաև պատասխանատու եմ եղել մարտական հերթապահության կազմակերպման համար: Տվյալ դեպքերի ժամանակ առաջնագծի անմիջական գործողություններն այդ դեպքերի հետ պետք չէ կապել»,- ասել է նա:

Անդրադառնալով հաջորդ սկանդալային մեղադրանքին, թե բանակը կրակել է բնակարանների ուղղությամբ, Արտակ Դավթյանը պատասխանել է. «Բանակը չի կրակել բնակարանների ուղղությամբ, եթե կրակել է՝ կրակել են անհատ ինչ-որ զինծառայողներ, որոնք ունեն ազգանուններ, որոնց տակ կանգնած են անհատ մարդիկ»:

Ճշտող հարցին, թե կրակելու հրաման եղե՞լ է, ԳՇ պետը հայտնել. «Նման հրաման չի եղել»:

Հիշեցնենք նաեւ, որ Նիկոլ Փաշինյանը սեպտեմբերի 11-ին Դավթաշեն վարչական շրջանում «Իմ քայլը» դաշինքի հանրահավաքին հայտարարել էր. «Ռոբերտ Քոչարյանը 2008 թ. հայ-ադրբեջանական սահմանից զորքերը հանել է, բերել եւ սեփական ժողովրդին օկուպացրել է, եւ դա ապացուցված է: Եվ այդ ընթացքում մեր երեխեքին խրամատներում փոխող չի եղել, նրանք, որ պետք է մնային 14 օր, մնացել են շատ ավելի երկար: Մեր սահմանը եղել է անպաշտպան»:

Եւ, անկասկած, ողջունելի է, ուրախալի է, որ շուրջօրյա նյարդային իրավիճակում, երբ հնչում են սկանդալային եւ խիստ վտանգավոր հայտարարություններ, գտնվում է մարդ, այս դեպքում Արտակ Դավթյանը, որը սառնասրտորեն պատասխանում է հնչեցված մեղադրանքներին եւ միաժամանակ փորձում հանդարտեցնել իրավիճակը եւ հանրությունը դուրս բերել այս խելակորույս վիճակից:

Մեկ անգամ շեշտենք, բանակին, բանակի ղեկավարությանը, շարքայինններին, սպայական կազմին վարկաբեկելու փորձերը չեն բխում ոչ մեր պետության, ոչ էլ ժողովրդի շահերից:

Վարդան Մխիթարյան

Top-News.am