Բրիտանական X Factor-ին մասնակցած հայուհին «գրավել» է Ռոբի Ուիլյամսին՝ ստիպելով երգչի կնոջը «խանդել» (տեսանյութ)

Բրիտանական X Factor 2018 հեռուստանախագծի շրջանակում ելույթ է ունեցել հայազգի Աթենա Մանուկյանը, որը հանդես է եկել բավական համարձակ կերպարով՝ համացանցի օգտատերերին դրդելով քննարկել իր ելույթը:

Հայտնի է, որ Հունաստանից ժամանած 24-ամյա Աթենան բարեմասնություններն ի ցույց դնող բեմական հագուստով կատարել է Բեյոնսեի Crazy in Love հիթը: Ժյուրիի անդամ Ռոբի Ուիլյամսը չի կարողացել թաքցնել իր հիացմունքը, ինչի պատճառով բրիտանացի երգչի կինը՝ նույնպես ժյուրիի կազմում ներառված Աիդա Ֆիլդը, ամուսնուն խեթ հայացքով է նայել:

«Ի՞նչ է, հիմա չե՞մ կարող կարծիքս արտահայտել»,-հայուհու ելույթից հետո կատակել է Ուիլյամսը՝ նայելով կնոջը:

Նա ընդգծել է, որ Մանուկյանի ելույթը հրաշալի էր և որ նրա համար ճիշտ երգեր ընտրելու դեպքում հնարավոր է աղջկան իսկական փոփ աստղ դարձնել:

Նրա կինը ևս նշել է, որ ցանկանում է գեղեցկուհուն հնարավորություն տալ: Ժյուրիի մյուս անդամ Լուի Թոմլինսոնը «ոչ» է ասել Մանուկյանին, մինչդեռ 4-րդ անդամը՝ հայտնի հեռուստահաղորդավար ու պրոդյուսեր Սայմոն Քոուելը, ասել է, որ ոչ մի դեպքում չէր կարող «ոչ» ասել այս կատարմանը:

rusarminfo.ru-ն հավելում է, որ Աթենա Մանուկյանը սկսել է երգել 12 տարեկանից: Վերջին յոթ տարում նա 3 անհատական ձայնասկավառակ է թողարկել: