Արենիում կրկին գինու տոն է

Հոկտեմբերի 3-ին Վայոց ձորի Արենի գյուղը կրկին կհյուրընկալի գինու սիրահարներին։ Արենիի գինու փառատոնն այս տարի կանցկացվի ժամը 11։00-ից մինչև 20։00-ն։ Այս մասին ասուլիսի ժամանակ ասաց ԷվենտՏուրա ընկերության համահիմնադիր Նունե Մանուկյանը։ Մուտքն անվճար է։ Օրվա ընթացքում նախատեսված են գինու համտեսներ, երաժշտական ու պարային ծրագրեր, ավանդական խաղեր և այլ ժամանցային միջոցառումներ։

Փառատոնի մեկնարկը կտրվի ավանդական խաղողի ճզմման արարողությամբ, որին կհաջորդեն կենդանի երաժշտության և պարի կատարումներ, անհատ կատարողների ելույթներ ու տարբեր ժամանցային ծրագրեր։ Մանուկյանի ներկայացմամբ՝ այս տարվա առանձնահատկություններից մեկը փառատոնի նոր ձևաչափն է․ այցելուների համար առաջարկվում է հուշանվերային փաթեթ՝ գինու բրենդավորված բաժակով, բաժակի պատյանով և փառատոնային գրքույկով։ Փաթեթն արժե 7000 դրամ, իսկ գրքույկը հնարավոր է ձեռք բերել նաև առանձին՝ 2000 դրամով։

Գրքույկը նախատեսված է ոչ միայն որպես հուշանվեր։ Այն այցելուներին հնարավորություն է տալիս մասնակցել փառատոնի որոշ ինտերակտիվ ծրագրերին, այդ թվում՝ խաղերին և հատուկ առաջարկներին, ինչպես նաև գործընկերների կողմից տրամադրվող զեղչերին։

Արենիի գինու փառատոնի հիմքում, սակայն, միայն մեկօրյա միջոցառումը չէ։ «Արենի համայնքային զարգացման հիմնադրամ»-ի տնօրեն Սյուզան Մարգարյանը ասուլիսի ժամանակ անդրադարձավ փառատոնի՝ համայնքի զարգացման և տեղական արտադրանքի ներկայացման նշանակությանը։ Արենին Հայաստանի գինեգործության կարևոր կենտրոններից է, իսկ գյուղի հարակից Արենի-1 քարանձավում հայտնաբերված գինեգործական համալիրը թվագրվում է շուրջ 6100 տարի առաջ։

Այս ժառանգությունը նաև կապվում է տարածաշրջանի ժամանակակից գինեգործության զարգացման հետ։ Մարգարյանը ներկայացրեց, որ վերջին տարիներին Արենիում զարգացել են ոչ միայն գինեգործությունը, այլև զբոսաշրջային ենթակառուցվածքները՝ ավելացել են հյուրատներն ու տեղական արտադրանքը ներկայացնող վայրերը։ Փառատոնը ևս այդ գործընթացի կարևոր մասերից է՝ նպաստելով գինու զբոսաշրջության զարգացմանն ու համայնքի տնտեսական ակտիվությանը։

Տարածաշրջանի գինեգործական առանձնահատկություններից է նաև տեղական խաղողի տեսակների օգտագործումը։ Վայոց ձորը հատկապես հայտնի է Սև Արենի խաղողի տեսակով, իսկ տարածաշրջանում տարածված են նաև Ոսկեհատը, Խաթուն Խարջին և Տոզոտը։

Այսպիսով, հոկտեմբերի 3-ի միջոցառումը մեկ օրվա գինու տոն լինելուց բացի, Արենիի և ամբողջ Վայոց ձորի՝ որպես գինու, գյուղական մշակույթի և զբոսաշրջության ուղղության ներկայացման հարթակ է։ Փառատոնը մեկ վայրում միավորում է տեղական գինեգործությունը, սնունդը, երաժշտությունը, արհեստներն ու համայնքային կյանքը՝ հայկական գինու պատմությունն ու ժամանակակից արտադրությունը ներկայացնելով նաև միջազգային այցելուներին։

Շողեր Ղլիջյան