«Երաժշտական Բաթումի» մշակութային ծրագիրը՝ «Արամ Խաչատրյան» համերգասրահում

Հայաստանում մեկնարկել են Վրաստանի Աջարիայի Ինքնավար Հանրապետության մշակույթի օրերը, որի շրջանակում«Արամ Խաչատրյան» համերգասրահում տեղի է ունեցել «Երաժշտական Բաթումի» մշակութային ծրագիրը. ելույթ են ունեցել Աջարիայի պետական «Բաթումի» անսամբլը և Բաթումիի պետական նվագախումբը։ Այս մասին տեղեկացնում են ԿԳՄՍՆ-ից:

Միջոցառմանը ներկա են  են եղել ԿԳՄՍ նախարարի տեղակալներ Արթուր Մարտիրոսյանը և Դանիել Դանիելյանը, Հայաստան ժամանած Աջարիայի Ինքնավար Հանրապետության մշակույթի նախարար Էլիսո Բոլքվաձենի գլխավորած պատվիրակության անդամները, Հայաստանում Վրաստանի արտակարգ և լիազոր դեսպան Գեորգի Շարվաշիձեն, Հայաստանում վրացական համայնքի ներկայացուցիչներ, արվեստասերներ։

Ողջունելով մշակութային ծրագրի անցկացումը՝ ԿԳՄՍ նախարարի տեղակալ Արթուր Մարտիրոսյանը նշել է․ «Մշակույթն այն լեզուն է, որը մարդկանց միջև ճանապարհներ է բացում, միավորում է ժողովուրդներին՝ անկախ աշխարհագրական սահմաններից, պատմական հանգամանքներից և լեզվական տարբերություններից։ Եվ հենց այդ լեզվով են այսօր խոսում Հայաստանը և Վրաստանը՝ երկու ժողովուրդներ, որոնց դարավոր հարևանությունն ու բարեկամությունը մշտապես ուղեկցվել են մշակութային փոխադարձ հարստացմամբ»։

Ելույթներով հանդես են եկել նաև Աջարիայի Ինքնավար Հանրապետության մշակույթի նախարար Էլիսո Բոլքվաձեն, Հայաստանում Վրաստանի արտակարգ և լիազոր դեսպան Գեորգի Շարվաշիձեն։

«Երաժշտական Բաթումի» մշակութային նախաձեռնությանը նախորդած ճեպազրույցում ԿԳՄՍ նախարարի տեղակալ Արթուր Մարտիրոսյանը շեշտել է, որ Հայաստան-Վրաստան միջպետական հարաբերություններում շատ կարևոր դեր է խաղում մշակույթի ոլորտի համագործակցությունը, որն ամրագրվում է նաև ամեն տարի գումարվող միջկառավարական խորհրդի նիստերի արձանագրություններում։

«Նախորդ տարի ամռանը Երևանում անցկացվեցին Վրաստանի մշակույթի օրեր։ Այս տարի աշնանը նախատեսում ենք Հայաստանի մշակույթի օրեր կազմակերպել Վրաստանում։ Օրերս Թբիլիսիում Վրաստանի գործընկերոջս հետ քննարկել ենք միջոցառումների մանրամասներն, ու կարծում եմ՝ մեզ հագեցած մշակութային օրեր են սպասվում»,-ասել է նախարարի տեղակալը։

Կարևորելով մշակութային երկխոսությունը՝ Արթուր Մարտիրոսյանը նաև նշել է, որ Թբիլիսիում գործում է Պետրոս Ադամյանի անվան հայկական դրամատիկական թատրոնը, որն արդեն նոր շենք ունի։ Նախարարի տեղակալի ընդգծմամբ՝ Հայաստանի և Աջարիայի Ինքնավար Հանրապետության միջև դինամիկ զարգացում է ապրում նաև կրթության, գիտության և երիտասարդության ոլորտների համագործակցությունը։

Վրաստանի Աջարիայի Ինքնավար Հանրապետության մշակույթի նախարար Էլիսո Բոլքվաձեն ընդգծել է, որ Հայաստանում սիրով հնչեցնում են վրացական ձայնը։

«Հայ-վրացական հարաբերությունները ոչ միայն ռազմավարական են, այլև բարեկամական ու մշակութային, որի ապացույցը մեր այստեղ գտնվելն է։ Վրաստանում մեծ հայկական համայնք կա, որն ակտիվ ներգրավված է Վրաստանի մշակութային կյանքում։ Նման միջոցառումների կազմակերպումը նպատակ ունի ամրապնդել կապերն ինչպես պաշտոնական, այնպես էլ հասարակությունների երկախոսության մակարդակով։ Հույս ունեմ, որ անցկացվող կրթական ծրագրերի շրջանակում հայ ուսանողները կկատարեն վրաց հեղինակների գործեր, իսկ Վրաստանում առավել հաճախ կհնչեն Կոմիտասի և Արամ Խաչատրյանի ստեղծագործությունները»,-նշել է Էլիսո Բոլքվաձեն։

Էլիսո Բոլքվաձեի այցի ընթացքում նախատեսված է հագեցած մշակութային և կրթական ծրագիր՝ միտված հայ-վրացական մշակութային կապերի խորացմանը, երիտասարդ տաղանդների խրախուսմանը և մասնագիտական փորձի փոխանակմանը։ Նախատեսված են այցելություններ Կոմիտասի ինստիտուտ-թանգարան, Սերգեյ Փարաջանովի թանգարան, Մեսրոպ Մաշտոցի անվան Մատենադարան, Երևանի Կոմիտասի անվան պետական կոնսերվատորիա, Պ. Չայկովսկու անվան միջնակարգ երաժշտական մասնագիտական դպրոց և այլ կրթամշակութային հաստատություններ:

Աջարիայի մշակույթի օրերն անցկացվում են մարտի 25-29-ը. «Երաժշտական Բաթումի» մշակութային ծրագիրը մարտի 28-ին կանցկացվի նաև Վանաձորի Շառլ Ազնավուրի անվան մշակույթի պալատում։