Հայ-վրացական երիտասարդական ճամբարին մասնակցում են ԿԳՄՍ նախարարի տեղակալն ու մի խումբ հայ երիտասարդներ

ԿԳՄՍ նախարարի տեղակալ Արթուր Մարտիրոսյանի գլխավորած պատվիրակությունը մարտի 22-28-ը Վրաստանի Հանրապետության Կախեթի շրջանի Թելավի քաղաքում մասնակցում է հայ-վրացական երիտասարդական ճամբարին։ Հայաստանից ճամբարին մասնակցում են ներկայացուցիչներ ակտիվ երիտասարդական շրջանակներից, ՀՀ բուհերի ուսանողներ, ինչպես նաև ԿԳՄՍ նախարարության ստեղծած և ՀՀ մարզերում գործող երիտասարդական կենտրոններ հաճախող 30 ակտիվ երիտասարդներ: Բացման միջոցառմանը ներկա է եղել նաև Վրաստանի կրթության, գիտության և երիտասարդության նախարարի տեղակալ Զվիադ Գաբիսոնիան:

Ճամբարի շրջանակում տեղի է ունեցել Հայաստանի և Վրաստանի երիտասարդների մասնակցությամբ երիտասարդական համաժողով, որի բացմանը ողջույնի խոսքով հանդես է եկել նաև ԿԳՄՍ նախարարի տեղակալ Արթուր Մարտիրոսյանը: Նա կարևորել է նմանօրինակ նախաձեռնությունների անցկացումը՝ նշելով, որ այն հարթակ է երկու երկրների համագործակցության խորացման, ինչպես նաև երիտասարդների միջև ուղիղ շփումների, փորձի փոխանակման և փոխըմբռնման ամրապնդման համար։ Կարևորելով Հայաստան-Վրաստան պատմական բարեկամական կապերը՝ նա ընդգծել է անկախությունից հետո երկկողմ շփումների զարգացումն ու համագործակցության խորացումը՝ բազմակողմ ծրագրերի կյանքի կոչմամբ:

«Մենք կարևորում ենք միջազգային համագործակցության ընդլայնումն ու խորացումը՝ որպես երիտասարդական քաղաքականության արդյունավետ իրականացման կարևոր բաղադրիչ։ Այս առումով առանձնահատուկ տեղ է զբաղեցնում համագործակցությունը մեր բարեկամ և հարևան Վրաստանի հետ։ Վերջին տարիներին մեր երկրների միջև երիտասարդական համագործակցության կայուն և դինամիկ զարգացում է արձանագրվել։ Մասնավորապես՝ ձևավորվել է արդյունավետ համագործակցության ավանդույթ՝ կազմակերպելու Հայաստանի և Վրաստանի երիտասարդների մասնակցությամբ երիտասարդական միջոցառումներ։ Դրանք կարևոր հարթակ են փորձի փոխանակման, նոր գաղափարների ձևավորման, միջանձնային կապերի և մեր ժողովուրդների միջև փոխվստահությունն ամրապնդելու առումով, որոնք նպաստում են նաև տարածաշրջանային համագործակցության խորացմանը»,- ասել է Արթուր Մարտիրոսյանը։

Հայաստան-Վրաստան համագործակցության շրջանակում նա կարևորել է կրթական տարբեր մակարդակներում փոխգործակցությունը՝ անդրադառնալով Թբիլիսիի պետական համալսարանում գործող հայագիտական կենտրոնի գործունեությանը, Հայաստանի և Վրաստանի բուհերում փոխադարձաբար հատկացվող կրթաթոշակային տեղերին: Արթուր Մարտիրոսյանը ներկայացրել է ՀՀ հանրակրթական դպրոցներում ներդրված տարածաշրջանային լեզուների ուսուցման ծրագիրը, որում ներառված է նաև վրացերենի ուսուցումը: Նա շեշտել է նաև Վրաստանի հայկական դպրոցներում հայերենի արդյունավետ ուսուցման կարևորությունը:

Եզրափակելով խոսքը՝ Մարտիրոսյանը դիմել է երիտասարդներին՝ ընդգծելով, որ նրանց ակտիվ մասնակցությունը, գաղափարներն ու նախաձեռնությունները կարևոր դեր ունեն հասարակությունների ապագայի կերտման գործում. «Համոզված եմ, որ այս ֆորումը կդառնա արդյունավետ երկխոսության և նոր համագործակցությունների սկիզբ: Ուրախ եմ, որ նման նախաձեռնություններն ունեն շարունակական բնույթ և դարձել են ամենամյա; Վստահ եմ, որ դրանք կընդլայնվեն՝ ընդգրկելով նոր թեմատիկ ուղղություններ և համագործակցության նոր ձևաչափեր»:

Նա Վրաստանի երիտասարդներին հրավիրել է 2027 թ. երիտասարդական մայրաքաղաք Ստեփանավան, որտեղ անցկացվելու է հաջորդ համատեղ երիտասարդական ֆորումը:

Ողջույնի խոսքով հանդես է եկել նաև Վրաստանի կրթության, գիտության և երիտասարդության նախարարի տեղակալ Զվիադ Գաբիսոնիան։ Նա առանձնակի կարևորել է հայ և վրացի երիտասարդների փոխադարձ շփումները՝ հույս հայտնելով, որ մասնակիցների համար ճամբարը կլինի ոչ միայն հաճելի, այլև արդյունավետ ժամանց:

Հանդիպման շրջանակում գործընկեր նախարարի տեղակալները պատասխանել են համաժողովին մասնակցող երիտասարդների հարցերին:

Հաջորդիվ տեղի են ունեցել քննարկումներ, որոնց մասնակցել է ԿԳՄՍ նախարարության երիտասարդական հարցերի վարչության պետի տեղակալ Արմենուհի Պետրոսյանը: Նա ներկայացրել է ՀՀ երիտասարդական քաղաքականության զարգացումները, Հայաստանի փորձը երիտասարդության ոլորտում, անդրադարձել 2025 թվականին ոլորտային օրենքի ընդունումից հետո Հայաստանի երիտասարդական քաղաքականության հիմնական ուղղություններին։ «Հայաստանում երիտասարդությունը դիտարկվում է որպես երկրի զարգացման ռազմավարական ռեսուրս։ Պետական քաղաքականության առանցքում են երիտասարդների ներուժի բացահայտումը, նրանց մասնակցության խթանումը և ինքնաիրացման հնարավորությունների ստեղծումը։ Վերջին տարիներին երիտասարդական քաղաքականությունն աստիճանաբար անցում է կատարել ծրագրային մոտեցումից դեպի ավելի համակարգային և ինստիտուցիոնալ զարգացման փուլ։ 2025 թվականը կարելի է վստահորեն համարել բեկումային Հայաստանի երիտասարդական քաղաքականության համար»,- նշել է նախարարության ներկայացուցիչը և անդրադարձել արդեն ընդունված «Երիտասարդական քաղաքականության մասին» օրենքի սահմանած հիմնական սկզբունքներին, նպատակներին և դերակատարների շրջանակին։

Քննարկման ընթացքում ընդգծվել է՝ Հայաստանում մեծ ուշադրություն է դարձվում երիտասարդական աշխատանքին՝ որպես երիտասարդների հետ ոչ ֆորմալ կրթության և զարգացման կարևոր գործիք։

«Հայաստանի պետական քաղաքականության կարևոր ուղղություններից է երիտասարդական միջավայրերի ձևավորումը։ Խոսքը վերաբերում է այնպիսի անվտանգ և զարգացնող տարածքների ստեղծմանը, որտեղ երիտասարդները կարող են սովորել նոր հմտություններ, իրականացնել նախաձեռնություններ, շփվել և համագործակցել։ Հայաստանի երիտասարդական քաղաքականության կարևոր ուղղություններից է նաև միջազգային համագործակցության զարգացումը։ Այս համատեքստում առանձնահատուկ կարևորություն ունի համագործակցությունը Վրաստանի հետ»,- ասել է Արմենուհի Պետրոսյանը:

Հայ-վրացական երիտասարդական ճամբարի նպատակն է խթանել Հայաստանի և Վրաստանի երիտասարդների համագործակցությունը, ամրապնդել բարեկամական հարաբերությունները և հիմք ստեղծել ապագա համատեղ ծրագրերի համար: Ճամբարի շրջանակում երիտասարդները կձևավորեն միջմշակութային կապեր, կներկայացնեն իրենց մշակութային առանձնահատկությունները, կծանոթանան երկու երկրների պատմությանը և մշակույթին, ինչպես նաև կմասնակցեն սպորտային, ինտելեկտուալ և ժամանցային մի շարք միջոցառումների։

Վրաստան կատարած այցի շրջանակում ԿԳՄՍ նախարարի տեղակալ Արթուր Մարտիրոսյանը հանդիպում է ունեցել Վրաստանի մշակույթի նախարար Գեորգի Միրցխուլավայի հետ, որի ընթացքում քննարկվել են առաջիկայում Հայաստանում կազմակերպվելիք Աջարիայի մշակույթի օրեր, ինչպես նաև ամռանը Վրաստանում անցկացվելիք Հայաստանի մշակույթի օրեր միջոցառումների նախապատրասական աշխատանքներին վերաբերող հարցեր:

Վրաստանի կրթության, գիտության և երիտասարդության հարցերի նախարարի տեղակալ Զվիադ Գաբիսոնիայի հետ երկկողմ աշխատանքային հանդիպման ժամանակ քննարկվել են կրթության, գիտության և երիտասարդության ոլորտներում համագործակցության ընդլայնմանը վերաբերող հարցեր: