CENTCOM-ի ղեկավարը հայտարարել է Իրանի հարձակողական կարողությունների զգալի անկման մասին

ԱՄՆ Կենտրոնական հրամանատարության (CENTCOM) ղեկավար Բրեդ Քուփերը «Iran International» հեռուստաալիքին տված հարցազրույցում հայտնել է, որ Իրանը վերջին շաբաթների ընթացքում ավելի քան 300 անգամ դիտավորյալ թիրախավորել է տարածաշրջանի քաղաքացիական օբյեկտները։ Ըստ հրամանատարի՝ նման գործողությունները վկայում են Թեհրանի «հուսահատության» մասին, քանի որ նրա ռազմական հնարավորությունները հետևողականորեն քայքայվում են։

ԱՄՆ ռազմական գերատեսչության տվյալներով՝ եթե հակամարտության սկզբնական փուլում Իրանը կիրառում էր տասնյակ անօդաչու թռչող սարքեր և հրթիռներ, ապա այժմ այդ հարձակումները սահմանափակվում են միայն մեկ կամ երկու միավորով։

Պենտագոնի ներկայացրած վերջին հաշվետվությունները հաստատում են, որ մարտի սկզբից ի վեր իրանական հրթիռային արձակումների ինտենսիվությունը նվազել է 90 տոկոսով, իսկ անօդաչուների հարձակումները՝ 86 տոկոսով, ինչը փաստում է Իրանի կրակային հզորության կտրուկ թուլացման մասին։