Ես այդ գործի մեջ շատ զգացմունքներ եմ դրել. Սերժ Թանկյանը «Բնաջնջման մտադրություն» ֆիլմի երաժշտության ստեղծման մասին
Ամերիկյան System of A Down (SOAD) ռոք խմբի մենակատար Սերժ Թանկյանը ծավալուն հարցազրույց է տվել հեղինակավոր Rolling Stones ամսագրին՝ խոսելով Հայոց ցեղասպանության մասին ֆիլմերի համար երաժշտություն գրելու բարդությունների մասին:
Նա անդրադարձել է ռեժիսոր Ջո Բեռլինգերի «Բնաջնջման մտադրություն» ֆիլմին, որի սաունդթրեքի հեղինակն ինքն է:
«Դա Ցեղասպանության ժխտման մասին անհավանական վավերագրական ֆիլմ է, որն այնքան հոգեհարազատ էր ինձ, ընտանիքիս: Տատս ու պապս Ցեղասպանությունը վերապրածներ են, իսկ ես ամբողջ կարիերայիս ընթացքում խոսել եմ Ցեղասպանության մասին, կապել այն ներկայի հետ: Այս առումներով նման ֆիլմի համար երաժշտություն գրելը հոգեբանորեն բարդ էր: Ես այդ գործի մեջ շատ զգացմունքներ եմ դրել: Ջոն այնքան երջանիկ էր, որ կարողացա երաժշտության միջոցով փոխանցել այն, ինչ կատարվում էր ֆիլմում»,-նշել է անվանի ռոքերը:
Խոսելով ֆիլմի վրա աշխատելու ընթացքում ամենամեծ բարդության մասին՝ Թանկյանն ասել է, որ դա, հավանաբար, Ցեղասպանության փաստը մերժողի խոսքն իր ստուդիայում լսելն ու այդ կադրերի համար երաժշտություն գրելն էր:
«Ջոն վավերագրական ֆիլմի վարպետ է ու միշտ ներառում է հակադիր կարծիքներ: Նա ֆիլմում ներառել է Ցեղասպանությունը ժխտողի խոսքն ու դա ուղղակի սարսափելի էր: Նստել ստուդիայումս, նայել կադրերը, լսել ժխտողին ու դրա հիման վրա երաժշտություն գրել. ես Ջոյին ասացի, որ դա գարշելի է: Դա չափազանց բարդ էր: Հասկանում եմ, որ ֆիլմի համար երաժշտություն գրելու համար պարտադիր չէ չափից ավելի զգացմունքայնություն դրսևորել: Պարտադիր չէ անպայման լացել աշխատանքային գործընթացի ժամանակ, բայց երբ նման բան տեղի է ունենում, նշանակում է, որ ֆիլմն իրոք ազդեցիկ է»,-ասել է Թանկյանը:
Այնուհետ նա անդրադարձել է Ցեղասպանության մասին մեկ այլ ֆիլմի՝ «Խոստում»-ին, որի սաունդթրեքի ստեղծման վրա ինքն աշխատել է այս տարի կյանքից հեռացած Քրիս Քորնելի հետ:
Թանկյանի կարծիքով՝ ֆիլմի ամենաազդեցիկ պահն այն է, երբ հոլիվուդյան աստղ Քրիստիան Բեյլի հերոսը մտնում է հյուրանոց ու հայտարարում՝ «նրանք սպանում են տղամարդկանց, կանանց ու երեխաներին քշում անապատ»:
«Ես ասացի Քրիստիան Բեյլին, որ այդ հայտարարությունն ամբողջ ֆիլմի հիմքն է: Այն տևում է 15 վայրկյան, բայց այնքան ազդեցիկ է»,-նշել է Թանկյանը՝ հավելելով, որ այս ֆիլմի վրա աշխատելու ընթացքում շատ էր մտերմացել ու ընկերացել Քորնելի հետ:
«Հայոց ցեղասպանության հարցում կարևոր է հասնել այն գիտակցմանը, որ դա ուղղակի 100 տարի առաջ կատարված դեպք չէ. այդ «կեղտը» հիմա էլ է կատարվում աշխարհում: Քրիսին հաջողվեց այդ ամենն արտացոլել երգում, նա ստեղծեց այդ կապը, ինչի համար ես նրան երախտապարտ եմ»,-ասել է Թանկյանը:
Նա պատմել է, որ այժմ երաժշտություն է գրում 1988թ. ավերիչ երկրաշարժի մասին հայ-ռուսական արտադրության «Սպիտակ» ֆիլմի համար:
«Սա իսկապես շատ ծանր ֆիլմ է, որի համար դաշնամուրով ժամանակակից ստեղծագործություն եմ գրում: Այն երազկոտ է, երբեմն մռայլ, երբեմն էլ՝ պայծառ: Ես աշխատանքի կեսն արդեն արել եմ»,-մանրամասնել է Թանկյանը:
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Հայաստանն ու Իրանն աշխատում են սահմանին երկրորդ կամրջի նախագծի վրա
Իրանի հարստացված ուրանի պաշարները միջուկային օբյեկտների փլատակներում են
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...
Եվրամիությունը չի հասկանում Իրանում պատերազմի նպատակները. Կալաս
Լարիջանիի սպանությունից հետո Իրանը կասետային ռումբերով հարվածել է Թել Ավիվին
ԱԹՍ-ի հարվածի հետևանքով Դուբայի միջազգային օդանավակայանի մոտ հրդեհ է բռնկել
Երևանում և մարզերում կլինեն էլեկտրաէներգիայի ընդհատումներ
ԱՄԷ նախագահն ու Սաուդյան Արաբիայի թագաժառանգը քննարկել են տարածաշրջանային զարգացումները