«Պենելոպե, օ՜, Պենելոպե»․ Սիմոն Աբգարյանի պիեսի առաջնախաղը Սոս Սարգսյանի անվան Համազգային պետական թատրոնում

ՀՀ կրթության, գիտության, մշակույթի և սպորտի նախարարության, Սոս Սարգսյանի անվան Համազգային պետական թատրոնի և Ա. Պ. Չեխովի անվան միջազգային թատերական փառատոնի համագործակցությամբ փետրվարի 25-ին Սոս Սարգսյանի անվան Համազգային պետական թատրոնում տեղի կունենա «Պենելոպե, օ՜, Պենելոպե» ներկայացման հայաստանյան առաջնախաղը:

Առաջնախաղին ընդառաջ՝ այսօր տեղի է ունեցել մամուլի ասուլիս, որի բանախոսներն էին ԿԳՄՍ նախարարի տեղակալ Դանիել Դանիելյանը, Սոս Սարգսյանի անվան համազգային պետական թատրոնի գեղարվեստական ղեկավար, «Պենելոպե, օ՜, Պենելոպե» ներկայացման գլխավոր դերակատար Նարինե Գրիգորյանը և պիեսի հեղինակ, բեմադրիչ և բեմանկարիչ Սիմոն Աբգարյանը։

Նախարարի տեղակալ Դանիել Դանիելյանը նշել է, որ «Պենելոպե, օ՜, Պենելոպե» ներկայացման բեմադրությունը Սոս Սարգսյանի անվան Համազգային պետական թատրոնում մշակութային կյանքի իրադարձություններից է: Նախագծի իրականացման հիմքերը դրվել են դեռևս երկու տարի առաջ ԿԳՄՍ նախարար Ժաննա Անդրեասյանի՝ Ֆրանսիա կատարած այցի և Ֆրանսիայի մշակույթի նախարար Ռիմա Աբդուլ Մալակի՝ Հայաստան այցելության շրջանակում ձեռք բերված պայմանավորվածության շրջանակում:

«Համագործակցությունը միտված էր Հայաստան-Ֆրանսիա մշակութային կապերի խորացմանն ու ամրապնդմանը, համատեղ նախագծերի զարգացմանն ու հանրահռչակմանը: Առաջին քայլը եղավ Սիմոն Աբգարյանի ստեղծագործական խմբի այցելությունը Հայաստան, որի ընթացքում նա Գ. Սունդուկյանի անվան ազգային ակադեմիական թատրոնի բեմում ներկայացրեց իր հեղինակած և բեմադրած «Էլեկտրան՝ գետնախորշերից» պիեսը: Հունական ողբերգության մոտիվներով գրված այս պիեսն արժանացել է «Մոլիերի» երեք մրցանակի՝ «Հանրային թատրոնի լավագույն պիես», «Լավագույն բեմադրություն» և «Լավագույն ֆրանսախոս դրամատուրգ» գլխավոր անվանակարգերում: Հիմա մեզ սպասում է Սիմոն Աբգարյանի «Պենելոպե, օ՜, Պենելոպե» ներկայացման հայաստանյան առաջնախաղը՝ Սոս Սարգսյանի անվան համազգային պետական թատրոնի հետ համագործակցությամբ: Ուրախ եմ մեր դերասանների համար՝ Սիմոն Աբգարյանի հետ աշխատելու հնարավորության համար: Այս համագործակցությունը կնպաստի մշակութային երկխոսության խորացմանը և արվեստագետների միջև ստեղծագործական կապերի ամրապնդմանը»,- նշել է նախարարի տեղակալ Դանիել Դանիելյանը և շնորհակալություն հայտնել կողմերին մշակութային կարևոր համագործակցության և հրաշալի ներկայացման համար:

Սոս Սարգսյանի անվան համազգային պետական թատրոնի գեղարվեստական ղեկավար, ներկայացման գլխավոր դերակատար Նարինե Գրիգորյանի նշմամբ՝ Սիմոն Աբգարյանի հետ հանդիպումը երկար սպասված էր: Առաջին անգամ Սիմոն Աբգարյանին հանդիպել է 2021 թվականին, երբ Մոսկվայում մասնակցում էին Ա․ Պ․ Չեխովի անվան թատերական փառատոնին, սակայն մեծ արվեստագետի հետ ծանոթությունը կայացել է ավել ուշ՝ ԿԳՄՍ նախարարի տեղակալ Դանիել Դանիելյանի մասնակցությամբ. այդ հանդիպմամբ՝ հիմք է դրվել ստեղծագործական համագործակցության. «Սկսվեց երազանքի ճանապարհը, համատեղ աշխատանքը: Ինձ համար իրականում ամենամեծ իրադարձությունն այն է, որ Սիմոն Աբգարյան դրամատուրգը Հայաստանում բեմադրություն է արել: Պիեսը թարգմանել է Շուշանիկ Թամրազյանը, կազմվել է նաև Սիմոն Աբգարյանի պիեսների գիրքը: Կցանկանայի նաև հետագայում ինքս բեմադրել նրա պիեսներից»,- նշել է Նարինե Գրիգորյանը և պատմել նաև Սիմոն Աբգարյանի հետ աշխատանքի մասին։

Պիեսի Հեղինակ Սիմոն Աբգարյանն անդրադարձել է հայաստանյան թատրոների հետ իր համագործակցությանն ու առաջիկա ծրագրերին։

Սիմոն Աբգարյանի «Պենելոպե, օ՜, Պենելոպե» պիեսը նոր հայացք է Ոդիսևսի կնոջ՝ Հոմերոսի «Ոդիսականի» կենտրոնական կերպարներից մեկի պատմությանը։ Ներկայացման հերոսուհին՝ Դինահը, որը քսան տարի սպասում է պատերազմից ամուսնու վերադարձին, հավատարիմ է իր ընտանիքին, սեփական արմատներին։ Ներկայացման բոլոր իրադարձությունները տեղի են ունենում մեկ օրում՝ շաբաթ օրը։ Հերոսները պաշտպանում են իրենց ճշմարտությունը և սպասում կիրակի օրվան՝ հոգևոր հարությանը։ Պիեսի հեղինակ, բեմադրիչ և բեմանկարիչ՝ Սիմոն Աբգարյան /Ֆրանսիա/, երաժշտական ձևավորում՝ Տատյանա Բուրել /Ռուսաստան/, երաժշտությունը՝ «Վանական» ռոք խմբի, զգեստները՝ Թամարա Բարոյանի, լույսի նկարիչ՝ Զարուհի Թարխանյան, գրիմ՝ Անուշ Բարոյան։