Հայաստանի ընտրությունը հարցեր է առաջացնում. Զախարովա

Ռուսաստանի արտաքին գործերի նախարարության մամուլի խոսնակ Մարիա Զախարովան հայտարարել է, որ Հայաստանը, անշուշտ, ազատ է համագործակցել ցանկացած գործընկերի հետ, որը նպատակահարմար է համարում, սակայն ամերիկյան տեխնոլոգիաների ընտրությունը հարցեր է առաջացնում։ «Վաշինգտոնի կողմից առաջարկվող փոքր ատոմակայանները գոյություն չունեն, առավել ևս՝ ԱՄՆ-ում. դրանք պարզապես գոյություն ունեն թղթի վրա», - ասել է Զախարովան։ Նա նաև նշել է, որ Երևանում հայտարարված 9 միլիարդ դոլար արժողությամբ փոքր մոդուլային ռեակտորի կառուցման նախագծի վերաբերյալ որևէ կոնկրետ մանրամասներ չեն տրամադրվել։ 

Ըստ նրա՝ մի շարք հայկական լրատվամիջոցներ շտապել են լուրը ներկայացնել որպես Վաշինգտոնի կողմից աննախադեպ ներդրում հանրապետության տնտեսությունում: Սակայն գլխավոր հարցը նախագծի ֆինանսական մոդելում է։

Ռուսական կողմին հասանելի տեղեկատվության համաձայն՝ իբր սա ԱՄՆ-ի ուղղակի ներդրում չէ, այլ սխեմա, որի շրջանակներում Հայաստանը կկրի ծախսերը: Ֆինանսավորումը նախատեսվում էր տրամադրել TRIPP հիմնադրամի միջոցով, որը, ինչպես նախկինում հայտարարվել էր, ստեղծվում է ենթակառուցվածքային նախագծերի համար: Սակայն հիմնադրամն ինքնին դեռևս չի ստեղծվել։

Զախարովան հիշեցրել է, որ Ռուսաստանը տասնամյակներ շարունակ եղել է Հայաստանի հուսալի գործընկերը ատոմային արդյունաբերության մեջ: Այս տարիների ընթացքում ռուսական կողմը աջակցել է դրա շահագործմանը և պահպանմանը: «Մենք այժմ միասին աշխատում ենք կայանի կյանքի ևս մեկ երկարաձգման վրա մինչև 2036 թվականը», - հավելել է նա: