Երևանի քաղաքապետարանը հայտարարում է «Մաքուր Երևան» ստեղծագործական մրցույթի մեկնարկը

Երևանի քաղաքապետարանից հայտնում են.

««Մաքուր Երևան» նախաձեռնությունը միավորում է երիտասարդ ստեղծագործողներին՝ արվեստագետների, դիզայներների և ճարտարապետների, ովքեր պատրաստ են իրենց գաղափարներով փոխել քաղաքի մաքրության վերաբերյալ հանրային ընկալումը:

Այն բաց մասնակցությամբ, ոչ առևտրային և կրթական նախաձեռնություն է, որի նպատակն է գտնել նորարարական ու կիրառելի լուծումներ քաղաքի տեսողական և լսողական միջավայրի բարելավման համար։

Ո՞ւմ համար է մրցույթը

• 14–35 տարեկան երիտասարդների համար
• Կարող են մասնակցել ինչպես անհատներ, այնպես էլ թիմեր։

Մրցութային աշխատանքները ներկայացվում են հետևյալ ուղղություններով․

• «Քաղաքը տեսանելի է» – վիզուալ արտահայտչամիջոցներ՝ փողոցային արվեստ, արվեստային գրաֆիկա, պատկերային լուծումներ։
• «Ինտերակտիվ քաղաք» – թվային, ինտերակտիվ և տեխնոլոգիական լուծումներ։
• «Քաղաքային փորձառություն» – ժամանակավոր կամ շարժական լուծումներ՝ pop-up ձևաչափեր, ֆիզիկական միջամտություններ և տարածական փորձարկումներ, որոնք կարող են կիրառվել քաղաքային միջավայրում։
• «Քաղաքը խոսում է» – հաղորդակցային և իրազեկման լուծումներ՝ վիզուալ կոչեր, տեղեկատվական նյութեր և հաղորդագրություններ։

Ինչպե՞ս են գնահատվելու աշխատանքները

Աշխատանքները կգնահատվեն մասնագիտական ժյուրիի կողմից՝ հաշվի առնելով առաջարկների նորարարական մոտեցումը, իրագործելիությունն ու կիրառելիությունը քաղաքային պայմաններում, տեխնիկական և կառուցվածքային որակը, ինչպես նաև հասարակական ազդեցությունը և էկոլոգիական կայուն զարգացման ներուժը։

Ի՞նչ է սպասվում մրցույթի ավարտին

• Մրցույթի արդյունքները կներկայացվեն հանրային ցուցահանդեսի ձևաչափով:
• Կլինեն բաց քննարկումներ և մասնագիտական մեկնաբանություններ:

Եթե ունես գաղափար, որը կարող է փոխել մեր քաղաքի մաքրության նկատմամբ մշակույթը, ուրեմն միացի՛ր «Մաքուր Երևան» մրցույթին․ քաղաք, որին արժանի ենք, քեզ է փնտրում։

Գրանցվելու համար լրացրեք հայտը այստեղ։

Գրանցման վերջնաժամկետ՝ 03.04.2026»։