«Շոշափելով մատյանները. ամենքի Մատենադարանը»

Հունվարի 29-ին Մատենադարանի Մեսրոպ Մաշտոցի անվան հին ձեռագրերի գիտահետազոտական ինստիտուտի թանգարանում մասնակցել և ողջույնի խոսքով եմ հանդես եկել «Շոշափելով մատյանները. ամենքի Մատենադարանը» ներառական ծրագրի շրջանակում կազմակերպված ցուցադրությանը: Իմ խոսքում շնորհակալություն եմ հայտնել նման կարևոր նախաձեռնություն իրականություն դարձնելու համար. «Ուրախ եմ գիտակցել, որ մենք այսօր համախմբվել ենք այսպիսի կարևոր գաղափարի շուրջ։ Հասարակությունում համերաշխության և հավասար հնարավորությունների ձևավորումն անհնար է առանց համատեղ ու համակարգված ջանքերի, իսկ մեր ներկայությունը այստեղ հենց այդ մշակույթի վկայությունն է։ Հույս ունեմ, որ սա չի լինի մեկանգամյա միջոցառում, և առաջիկայում ոլորտում կունենանք էական ու կայուն արդյունքներ»:

Ընդգծել եմ, որ Մարդու իրավունքների պաշտպանի աշխատակազմն իր զեկույցներում պարբերաբար անդրադառնում է մշակութային և գիտական հաստատություններում մատչելիության ապահովմանն առնչվող խնդիրներին, իսկ ներկայումս՝ տարեկան հաղորդման պատրաստման ընթացքում, այս նախաձեռնությունը կարևոր ազդակ է նաև դրական փոփոխությունների մասին խոսելու։ «Եթե մենք նպատակ ունենք կառուցելու իրավական, մարդակենտրոն և արժեքահեն պետություն, ապա դա անհնար է առանց բոլորի համար հավասար հնարավորությունների լիարժեք երաշխավորման։ Սա համերաշխ հասարակություն և արժանապատիվ կենսագործունեություն ձևավորելու միակ ճանապարհն է։ Մեզ համար հիմնարար նշանակություն ունի «ոչ մի բան մեզ համար՝ առանց մեզ» գաղափարը։ Շնորհակալություն եմ հայտնում բոլոր այն մարդկանց և կառույցներին, ովքեր նախաձեռնել և իրականություն են դարձրել այս կարևոր գաղափարը»։

Միջոցառմանը ներկա են եղել ՀՀ կրթության, գիտության, մշակույթի և սպորտի նախարար, Մատենադարանի հոգաբարձուների խորհրդի նախագահ Ժաննա Անդրեասյանը, Մատենադարանի տնօրեն Արա Խզմալյանը, Հայաստանի կույրերի միավորման «Սոկրատ Շահնազարյանի անվան մշակույթի տան» տնօրեն, «Շոշափելով մատյանները․ ամենքի Մատենադարանը» ծրագրի փորձագետ Սիփան Ասատրյանը, քաղաքացիական հասարակության, կրթության բնագավառի ներկայացուցիչներ և այլք:

«Շոշափելով մատյանները․ ամենքի Մատենադարանը» թեմատիկ կրթական ծրագիրը նվիրված է ձեռագրաստեղծման արվեստին՝ շոշափելի կրկնօրինակների միջոցով (կաշվե կազմ, եղեգնյա և փետուրե գրիչներ, մագաղաթի նմուշ, վուշե թելեր, կապտալ, միջուկ տախտակ, աստառ, տողաշար)։ Միջնադարի շունչը փոխանցելու նպատակով մասնակիցները հնարավորություն կունենան ունկնդրելու միջնադարյան երաժշտություն, զգալու միջնադարյան անուշահոտ եթերայուղերի բույրը։ Ծրագրի թիրախային խումբը Երևանում և ՀՀ մարզերում բնակվող, տեսողության 1-ին և 2-րդ աստիճանի խնդիրներ ունեցող 4 տարեկանից բարձր անձինք են: Թանգարանում տեղադրվել են ցուցադրության նմուշների շոշափելի մանրակերտեր: Պատրաստվել են Գրիգոր Նարեկացու «Մատյան ողբերգության», Մովսես Խորենացու «Հայոց Պատմություն», Մալաթիայի Ավետարան, Ֆիրդուսի «Շահնամե» ձեռագրերի շոշափելի կրկնօրինակները:

Ծրագրի իրականացման ընթացքում ոլորտի փորձագետները կանցկացնեն խորհրդատվություն՝ ցուցանմուշների և կրթական ծրագրի նախապատրաստական աշխատանքների վերաբերյալ։