Իրանը հերքել է արևմտյան ԶԼՄ-ների հաղորդումներն անկարգությունների ժամանակ 30 000 զոհի մասին

Իրանի արտաքին գործերի նախարարության խոսնակ Էսմայիլ Բաղային հերքել է արևմտյան լրատվամիջոցների հաղորդումները երկրում անկարգությունների ժամանակ 30 000 զոհի մասին՝ այդ հայտարարություններն անվանելով «սուտ Հիտլերի ոճով»: «Արմենպրես»-ի փոխանցմամբ՝ այս մասին նա գրել է X սոցիալական հարթակում։

«Մեծ սուտ Հիտլերի ոճով. մի՞թե այդ քանակի մարդկանց էին նրանք պլանավորում սպանել Իրանի փողոցներում: Բայց նրանց դա չհաջողվեց, և հիմա նրանք փորձում են դա կեղծել զանգվածային  լրատվամիջոցներում: Իսկապես դաժան է», - գրել է Բաղային:

Իրանում ազգային արժույթի փոխարժեքի կտրուկ անկման և գնաճի պատճառով բողոքի ակցիաները սկսվել էին դեկտեմբերի 28-ին: Հունվարի 8-ից, ինչպես հայտարարել է Իրանի արտաքին գործերի նախարար Աբբաս Արաղչին, ցուցարարների շարքերում հայտնվել էին զինված ահաբեկիչներ: Թեհրանը անկարգությունների կազմակերպման համար պատասխանատու է համարում Իսրայելին և Միացյալ Նահանգներին: Հունվարի 23-ին Իրանում պաշտոնապես հայտնել են, որ զոհվածների ընդհանուր թիվը կազմել է 3117, որոնց  թվում կան ինչպես խաղաղ բնակիչներ, այնպես էլ անվտանգության ուժերի աշխատակիցներ: