Լարսի այլընտրանքային ճանապարհը պատրաստ կլինի 2026-ին

Վրաստանի տարածքով դեպի Ռուսաստան Հայաստանի այլընտրանքային ճանապարհը պատրաստ կլինի 2026-ին։ Վրաստանի կառավարությունը մտադիր է «Միջին միջանցք» նախագծի շրջանակում այս տարի ամբողջությամբ ավարտել երեք հարևանների՝ Հայաստանի, Ադրբեջանի և Թուրքիայի սահմաններ հասնող նոր մայրուղիների շինարարությունը։ Իսկ հենց Լարսի հատվածում կառուցվող՝ Լարսի այլընտրանքային ուղու շինարարությունն ակտիվ ընթացքի մեջ է։

Վրաստանը նախատեսում է 2026 թվականին ավարտել Միջին միջանցքի ծրագրով նախատեսված բոլոր ճանապարհների, այդ թվում՝ Ռուսթավի-Սադախլո նոր ճանապարհի շինարարությունը։ Այս ճանապարհը մայրաքաղաքի մոտակայքում գտնվող Ալգեթի բնակավայրից մինչև Սադախլո՝ Հայաստանի հետ սահման տանող նոր ճանապարհը կլինի, որ կրկնակի կկրճատի ժամանակը։

Այն շրջանցելու է Մառնեուլին և շրջակա մյուս բնակավայրերը՝ դառնալով Հայաստանից Ռուսաստան բեռնափոխադրումների համար նոր տարանցիկ ճանապարհ՝ միանալով այսպես կոչվող դարի նախագծին՝ Արևելք-արևմուտք ավտոմայրուղուն (E-60-ին), որն իր մեծությամբ երկրորդ եվրոպական տարանցիկ միջանցքն է։

Մառնեուլիի քաղաքապետարանի ավագանու անդամ Արսեն Հախվերդյանը «Ռադիոլուր»-ի հետ զրույցում ասում է՝ երկար բանակցություններից հետո ճանապարհի կառուցման համար շրջանի համապատասխան հողերն օտարվել են։ Ըստ նրա՝ այսօր արդեն առավել քան երբևէ ակներև է՝ Մառնեուլիով անցնող Հայաստան-Վրաստան-Ռուսաստան ռազմավարական ճանապարհը խիստ ծանրաբեռնված է, այլևս չի կարողանում ապահովել եթևեկության առկա հոսքերը․  

«Այդ ճանապարհը կթեթևանա․ կարճ ճանապարհը կգործի Սադախլոյից դեպի Ռուսթավի և Թբիլիսի, կշրջանցի Մառնեուլին։ Հողերը, (որ հիմնականում Մառնեուլիի գյուղերինն էին) արդեն գրեթե օտարված են։ Գործող ճանապարհը չի համապատասխանում ժամանակակից պահանջներին»։

Այսպիսով, Վրաստանի 2026 թվականի բյուջեի համաձայն՝ նախատեսվում է ամբողջությամբ ավարտել Ռուսթավի-Կարմիր կամուրջ և Ալգեթի-Սադախլո հատվածների շինարարությունը, որոնք տանում են դեպի Ադրբեջանի և Հայաստանի սահմաններ, ինչպես նաև կառուցել Բաթումի-Սարպի ճանապարհը, որը տանում է դեպի թուրքական սահման։

«Այս նախագծերի իրականացման արդյունքում կավարտվի Միջին միջանցքի այն հատվածների շինարարությունը, որոնք կապում են Վրաստանը, Ադրբեջանը, Հայաստանը և Թուրքիան», - նշվում է փաստաթղթում։

Վրաստանի տրանսպորտային միջանցքի ուսումնասիրության կենտրոնի տնօրեն Պաատա Ցագարեիշվիլին, անդրադառնալով այս և զուգահեռաբար ընթացող մեկ այլ շինարարության՝ Լարս տանող Մցխեթա-Ստեփանծմինդա-Լարս ուղու Գուդաուրի-Կոբի դժվարանցանելի հատվածում նոր ճանապարհի ու թունելի կառուցմանը, ասում է․

«Վրաստանի տարածքում կլինի ժամանակակից ավտոմոբիլային ճանապարհ Հայաստանի հետ սահմանից մինչ Ռուսաստանի հետ սահման։ Նախագիծն աննախադեպ է և Վրաստանի, և Հայաստանի համար։ Վրաստանից Հայաստան և Հայաստանից Ռուսաստան ու Եվրոպա ուղղությամբ բեռներն արագ տեղ կհասնեն։ Այն կօգնի նաև Վրաստանի տուրիստական բիզնեսին»։

Վրաստանը, ըստ քաղաքագետ Գիորգի Գոբրիձեի, փորձելու է տարածաշրջանում ստեղծված նոր իրողությունների պայմաններում առավելագույնս պահպանել տրանզիտային դերը։

«Այս ենթակառուցվածքները զգալիորեն կկարճացնեն երկրների միջեւ հեռավորությունը, իսկ երթևեկն էլ ավելի անվտանգ դարձնում: Ալգեթի-Սադախլոն կարևոր դեր ունի մեր երկու երկրների համար: Ընդհանրապես, Վրաստանը հետաքրքրված է ինչպես Հայաստանի, այնպես էլ մյուս բոլոր հարևանների համար»։

Այսպիսով Հայաստանի սահմանից սկսվող ու Մառնեուլին շրջանցող ճանապարհը միանալու է Թբիլիսիից Ռուսաստանի սահման հասնող նոր ճանապարհին՝ Ստեփանծմինդա-Մցխեթա-Լարսի այլընտրանքին։ Հենց Լարսի հատվածում կառուցվող՝ Լարսի այլընտրանքի շինարարությունն ակտիվ ընթացքի մեջ է։

Դեպի ռուսական սահման ձգվող ոլորանների խիստ դժվարանցանելի հատվածը փոխարինվում է 23 կմ երկարությամբ ասֆալտապատ ճանապարհով՝ 6 կամրջով և 5 թունելով։ Վրաստանում ամենաերկար 9 կմ-անոց թունելի (Քվեշեթի-Կոբի) կառուցումն այս հատվածում արդեն ավարտված է։

Գուդաուրի տանող հատվածը ևս նախատեսվում է բացել 2026 թվականին, և Վրաստանի բնակիչներն ու զբոսաշրջիկները կկարողանան օգտվել այդ ճանապարհից։ Նոր ճանապարհի շնորհիվ Մցխեթա-Ստեփանծմինդա-Լարս մայրուղին պետք է որ այլևս փակ չլինի։

Վրաստանը առաջնահերթություն է տալիս տարանցիկ երթուղիների զարգացմանը՝ ակտիվացնելով այս նախագծերը հատկապես տարածաշրջանային հաղորդակցությունների հնարավոր ապաշրջափակման ու նոր իրողությունների ֆոնին։

Նյութը՝ «Ռադիոլուր»-ի