2 տարվա բանտարկություն՝ բանանը կրքոտ ուտելու համար

Եգիպտացի փոփ երգչուհի Շիմային 2 տարով բանտարկել են I Have Issues («Ես խնդիրներ ունեմ») երգի հոլովակում «անառակության կոչերի» համար, հայտնում է The Guardian-ը:

Տեսանյութում նա դասարանում է հայտնվում ուսուցչուհու կերպարով: Բանան է ուտում, խնձորը լպստում, շրթունքներն է սեթեւեթորեն ներկում եւ ներքնաշորով կեցվածք է ընդունում գրատախտակի ֆոնին, որի վրա գրված է՝ «№69 դասարան»:

Կահիրեի դատարանը կատարողին նաեւ տուգանել է 10 հազար եգիպտական ֆունտով (560 դոլար): Երաժշտական տեսանյութի ռեժիսոր Մոհամմեդ Համալը նույնպիսի դատավճռի է արժանացել:

Եգիպտոսի ոստիկանությունը 21-ամյա Շիմային նոյեմբերին է կալանավորել: Իրավապահ մարմինների աշխատակիցները հայտարարել են, որ երգչուհին հոլովակում բանանը «շատ խոստումնալից» է կերել: Հոլովակի դեմ բազմաթիվ բողոքներ են ստացվել:

 NEWS.am