«Հնչող պատկերներ». բացվել է Գրիգոր Աղասյանի ծննդյան 100-ամյակին նվիրված ցուցահանդես

Հայաստանի ազգային պատկերասրահում բացվել է 20-րդ դարի երկրորդ կեսի հայ կերպարվեստի նշանավոր ներկայացուցիչ, մանկավարժ, հասարակական գործիչ Գրիգոր Աղասյանի (1926–2009 թթ.) ծննդյան 100-ամյակին նվիրված «Հնչող պատկերներ» լայնածավալ հետահայաց ցուցահանդեսը: Ցուցահանդեսի բացմանը ներկա են եղել ՀՀ վարչապետի աշխատակազմի ղեկավար Արայիկ Հարությունյանը, ԿԳՄՍ նախարարի տեղակալներ Ալֆրեդ Քոչարյանը և Դանիել Դանիելյանը, պաշտոնատար այլ անձինք, արվեստի գործիչներ ու արվեստասերներ:

ԿԳՄՍ նախարարության անունից արվեստագետի 100-ամյակի առիթով շնորհավորել է նախարարի տեղակալ Ալֆրեդ Քոչարյանը՝ նշելով. «Գրիգոր Աղասյանի նկարները յուրօրինակ ջերմություն են փոխանցում հին երևանյան պատկերներով։ Նրա գործերով ճանաչում ենք հին Երևանն իր գողտրիկ անկյուններով ու ապրած ժամանակաշրջանով։ Այս անչափ հարազատ գործերն իրենց արձագանքն են գտնում յուրաքանչյուրի սրտում»։

Նշենք, որ ցուցադրության համադրողն է Հայաստանի ազգային պատկերասրահի տնօրեն Մարինա Հակոբանը, որը նաև արվեստագետի թոռնուհին է։

«Նրա արվեստն այնպիսին է, ինչպիսին ինքն էր՝ բարի, ազնիվ և ներդաշնակ։ Ի թիվս բազմաթիվ այլ գործերի՝ առանձնակի տեղ ունեն 1930-ականների Երևանին նվիրված գործերը։ Այս առումով նրան կոչում են ոչ միայն գեղարվեստական արժեքներ ստեղծող արվեստագետ, այլև Երևանի վավերագիր. նրա գործերն այսօր ունեն պատմական, վավերագրական նշանակություն»,- ասել է նա ելույթի խոսքում։

Ցուցահանդեսում ընդգրկված են շուրջ 100 նմուշներ, որոնց մի մասը ներկայացվում է առաջին անգամ: Ցուցահանդեսը բացահայտում-ներկայացնում է հին Երևանի եզակի վավերագրող, գեղանկարիչ, գրաֆիկ, օֆորտի վարպետ, գիտական հոդվածների ու հետազոտությունների հեղինակ Գրիգոր Աղասյանի շուրջ վեց տասնամյակի ստեղծագործական ուղին: Ցուցադրությունը հնարավորություն է ընձեռում ճամփորդելու Իտալիայի և Ֆրանսիայի, Անգլիայի և Իսպանիայի, Էստոնիայի և Վրաստանի քաղաքներով, Հայաստանի գողտրիկ գյուղերով ու ավաններով, երևանյան հին բակերով ու կոլորիտային շուկաներով, հրապարակներով ու փողոցներով, ինչպես նաև վիրտուալ իրականության միջոցով շրջելու նկարչի սիրելի արվեստանոցում:

Վիրտուալ իրականության (VR) գործիքների միջոցով այցելուն կարող է հայտնվել Գրիգոր Աղասյանի արվեստանոցում, որտեղ նկարիչը ստեղծագործել է շուրջ 40 տարի: Այստեղ են արվեստագետի նկարակալը, մագնիտոֆոնը, ներկապնակն ու վրձինները, արևոտ և ընդարձակ պատշգամբից բացվող քաղաքի համայնապատկերը։ Ինտերակտիվ գործիքներով այցելուն կարող է ինքնուրույն պտտել օֆորտի հաստոցի անիվը, ստեղծագործել նկարչի վրձիններով, միացնել մագնիտոֆոնը, թերթել սեղանին դրված ճեպանկարներն ու էտյուդները:

Չորս ենթատարածքներում ամփոփված ցուցադրությունն առանձին թեմատիկ-բովանդակային, հուզական-հոգեբանական շեշտադրումներով ներկայացնում է արվեստագետի ստեղծագործության հիմնական հետաքրքրությունները: Ցուցադրության առաջին սրահում նկարչի հարազատ Երևանն է՝ իր բնակիչներով ու ու տրամադրություններով: Ցուցադրության առանցքային մաս են կազմում «բրեյգելյան» և նկարադաշտի կուռ տրամաբանությամբ առանձնացող բազմաֆիգուր թեմատիկ կոմպոզիցիաները, որոնք ունեն ոչ միայն գեղարվեստական-էսթետիկական, այլև պատմական-վավերագրական նշանակություն:

Երկրորդ սրահը նվիրված է նկարչի կյանքում կարևոր դեր ունեցած ճամփորդություններին ու քաղաքային-ուրբանիստական, շրջագայությունների ընթացքում սուր դիտողականությամբ ստեղծված պատումներին, հատկապես առանձնանում են կավճամատիտի ու ջրաներկի տեխնիկաներով արված մոդեռնիստական գրաֆիկական թերթերը: Երրորդ և չորրորդ սրահները հաջորդաբար ներկայացնում են արվեստագետի միջավայրը ու հիշողությունը, հայկական քաղաքն ու գյուղը: