«Սևան» ազգային պարկում ապամոնտաժումները շարունակական են լինելու

Կառավարության նիստում այլ հարցերի հետ քննարկվեց նաև «Սևան» ազգային պարկի տարածքում քսաներեք շենք-շինությունների ապամոնտաժման  վերաբերյալ հարցը։ Որոշ մանրամասներ իմանալու համար «Թոփ նյուզ» լրատվականը զրուցեց «Սևան» ազգային պարկի տնօրեն Կարեն Մնացականյանի հետ։

«Սևան» ազգային պարկի տնօրենի խոսքով՝ պարկի տարածքում ապօրինի շինություններ քանդելու երևույթը նոր չէ։ 2020 թ.-ից մինչ այս պահը նման շուրջ հարյուր հիսուն ապօրինի շենք-շինություններ են ենթարկվել ապամոնտաժման, իսկ միայն այս տարի այդպիսի շինությունների թիվը մոտ երեսունի է հասնում։
Սիմոնյանի գնահատմամբ՝ շինությունները հիմնականում շարժական տնակներ են, իսկ քարե շինությունները համեմատաբար ավելի քիչ են «Սևան» ազգային պարկի տարածքում։
«Տնակները, քանի որ շարժական են, ցանկացած ժամանակ, երբ ծանուցում ենք, մարդիկ տարածքից դուրս են բերում։ Դա մի քիչ ավելի հեշտ գործընթաց է», — մեզ հետ զրույցում պարզաբանեց ազգային պարկի տնօրենը։
Իսկ ինչպե՞ս են հայտնվել շինություններ ազգային պարկում
 Տնօրենի հավաստմամբ՝ դրանք ավելի վաղ շրջանի կառուցված շենք-շինություններ են, մի մասն անգամ սեփականաշնորհված։ Դեռ խորհրդային շրջանում կառուցված շինություններն ունեն սեփականության իրավունք՝ դրանով առաջացնելով բարդություններ ապամոնտաժելու համար։
Առաջնահերթ փորձում են լուծել լճին հարակից շինությունների ապամոնտաժման խնդիրը։ Դրանք, Մնացականյանի պարզաբանմամբ, հիմնականում ծովի մակարդակից 1901,5  մետրից ցածր գտնվող շինություններն են։ Նաև կան շինություններ, որոնք արդեն լճի մակարդակի բարձրացման հետևանքով անցել են ջրի տակ։
Ըստ տնօրենի՝ հնարավոր չէ երեսուն, քառասուն տարվա կուտակված խնդիրները այսքան հեշտությամբ վերացնել։ Փորձում են աստիճանաբար դա անել։ Իրենց առջև խնդիր են դրել յուրաքանչյուր տարի ապամոնտաժել նախորդ տարվանից ավելիշատ  ապօրինի շենք-շինություններ։
Մեզ հետ զրույցում տնօրենը խոսեց նաև բարդությունների մասին։ Ըստ նրա՝ առաջին հերթին նման ծավալի ապամոնտաժման աշխատանքների կատարման համար կարիք կա ֆինանսական միջոցներ դնել։
 «Խնդիր է էդ շինաղբը տարածքից տեղափոխելը՝ դա բավականին մեծ ծախսերի հետ կապված աշխատանք է», -ընդգծում է տնօրենը և ավելացնում, որ չնայած դա մտնում է Սևան համայնքի լիազորությունների մեջ, իրենք էլ ամեն կերպ աջակցում են համայնքին այդ գործում։ ««Սևան» ազգային պարկն էլ ունենալով իր տարածքը բնականաբար դա իրեն էլ է մտահոգում և ինքն էլ է աջակցում համայնքին և լինում են դեպքեր, որ մենք հենց մեր ուժերով դա ապամոնտաժում ենք»,-նշեց Կարեն Մնացականյանը։ 

Հիշեցնենք, որ օրեր առաջ կառավարության նիստի ժամանակ ՀՀ գլխավոր դատախազ Աննա Վարդապետյանը հայտարարել էր, որ մի շարք միջնորդագրեր են ուղարկել Սեւան համայնքին եւ Սեւան ազգային պարկ ՊՈԱԿ-ին՝ Սեւանա լճի ափամերձ, բացարձակ նիշից ցածր տարածքների 34 հողամասերում առկա ապօրինի կառուցված շենք-շինություններն ապամանոտաժելու եւ հողամասը նախկին տեսքի բերելու համար։

«Աշխատանքները բավականին դանդաղ են ընթանում, այս պահի դրությամբ երեք հողամասում շենք-շինություններն են ամբողջությամբ ապամոնտաժվել։ Մնացած հողամասերի վերաբերյալ հարուցվել են վարչական վարույթներ եւ կայացվել են 23 քանդման որոշումներ, որոնք դեռեւս կատարվել։ Բայց մենք շարունակելու ենք հսկողություն իրականացնել, եւ եթե աշխատանքները չկատարվեցին, պահանջելու ենք դատական կարգով հարկադրել կատարել քանդման աշխատանքները»,- ասել էր Գլխավոր դատախազ Աննա Վարդապետյանը։

Ըստ Աննա Վարդապետյանի՝ գույքերը պատկանում են նախկին եւ ներկա պաշտոնատար անձանց։ «Բնականաբար, դրանք հայտնի գույքեր են՝ մեկը Հարսնաքարն է, մեկը նախկին ոստիկանապետ Վլադիմիր Գասպարյանին պատկանող առանձնատունն է, գույքերից մեկը Նորայր Փանոսյանին է պատկանում, մեկ գույք կա, որը պատկանում է Սասուն Միքայելյանին։