«Կասկադ մշակութային հանգույց» նախագիծը քննարկվել է Գիտամեթոդական խորհրդի նիստում
ԿԳՄՍ նախարարությանը կից գիտամեթոդական խորհրդի 21-րդ նիստում քննարկվել է Երևանի Կենտրոն վարչական շրջանում գտնվող «Կասկադ» համալիրի (հանրապետական նշանակության հուշարձան) վերակառուցման էսքիզային առաջարկը:
Թամանյան փողոց 10/1 հասցեի հողամասում՝ համալիրի Ա1 գոտում նախատեսվող «Կասկադ մշակութային հանգույց» ծրագրի էսքիզային առաջարկով նախատեսվում է «Կասկադ» համալիրի անավարտ հատվածի կառուցում՝ ապահովելով մշակութային կոթողի ամբողջական, ավարտուն տեսքը և համալիրի կապը Հաղթանակի 50-ամյակի հուշարձանի հետ:
Նիստին մասնակցել են ԿԳՄՍ նախարար Ժաննա Անդրեասյանը, Երևանի քաղաքապետ Տիգրան Ավինյանը, ԿԳՄՍ նախարարի տեղակալ Ալֆրեդ Քոչարյանը, ճարտարապետ, ծրագրի նախագահ Ռալֆ Լևեդեգը, «Willmotte and Associes» ճարտարապետական ընկերության նախագահ, էսքիզային առաջարկի հեղինակ, ֆրանսիացի անվանի ճարտարապետ Ժան-Միշել Վիլմոտը:
««Կասկադ» համալիրն առանձնահատուկ նշանակություն ունի Երևանի յուրաքանչյուր բնակչի համար: Այս ծրագիրը հատկապես կարևոր է ստեղծած հնարավորություններով. լիահույս եմ՝ դրա իրականացումն էապես կփոխի մեր քաղաքի մշակութային դիմագիծը՝ տարիքային տարբեր խմբերի համար ձևավորելով ժամանակակից կրթական և մշակութային նոր միջավայր»,- ողջունելով քննարկման մասնակիցներին` ասել է ԿԳՄՍ նախարար Ժաննա Անդրեասյանը:
Նա նաև շեշտել է` նորարարությանը զուգահեռ կարևոր են «Կասկադ» համալիրի պատմական շերտերի նշանակությունն ու ավանդույթների պահպանումը:
Երևանի քաղաքապետ Տիգրան Ավինյանը, ներկայացնելով գործընթացի նախապատմությունը, նշել է՝ տարբեր էսքիզային առաջարկների վերաբերյալ բազմաթիվ քննարկումներ են իրականացվել: Երևանի քաղաքապետարանի «Ակտիվ քաղաքացի» հարթակով հանրային քվեարկություն է իրականացվել ներկայացված առաջարկների շուրջ. հաղթել է քննարկվող «Կասկադ մշակութային հանգույց» նախագիծը:
«Ըստ նախագծի՝ տարածքի կենտրոնական հատվածում կառուցվելու են 1000-տեղանոց համերգասրահ, թանգարանային հատված, արվեստանոցներ, հանրային տարբեր տարածքներ՝ ժամանցի և հանգստի գոտիներ»,- հայտնել է Տիգրան Ավինյանը:
Ճարտարապետ Ջիմ Թորոսյանի հեղինակած լավագույն կառույցներից մեկի` «Կասկադ» համալիրի վերակառուցման էսքիզային առաջարկը ներկայացրել է ճարտարապետ Ժան-Միշել Վիլմոտը, որը քննարկվող էսքիզի հեղինակն է:
«Մեծ պատիվ է Երևանի համար այս նախագիծը ներկայացնելը: Հաշվի առնելով հուշարձանի պատմական արժեքը՝ ճարտարապետորեն շատ զգուշորեն ենք մոտեցել աշխատանքին՝ չխաթարելով ի սկզբանե մտածված լուծումները, որոնք նախատեսվել էին հեղինակի կողմից: Այդպիսով, նոր համալիրը պահպանում է հուշարձանի ոճային տրամաբանությունը»,- ասել է ճարտարապետը՝ ընդգծելով, որ նախատեսվում է տարածքի կանաչապատում:
Նա ներկայացրել է էսքիզային նախագծով առաջարկվող աշխատանքները, ճարտարապետական լուծումները, իրականացվող փոփոխությունները, մասնագիտական մոտեցումները և այլն՝ ընդգծելով նաև ճարտարապետներ Սարգիս Գուրզադյանի և Ասլան Մխիթարյանի աշխատանքների կարևորությունը գործընթացում:
Նիստի շրջանակում Գիտամեթոդական խորհրդի անդամները հարցեր են ուղղել հեղինակ ճարտարապետին, ներկայացրել իրենց առաջարկներն ու դիտարկումները: Մասնագետները ընդգծել են հուշարձանների պաշտպանության օրենսդրական դաշտի պահանջների պահպանման կարևորությունը, աշխատանքներն իրականացնելիս հուշարձանի բացառիկությունը հաշվի առնելու, ծավալատարածական լուծումներին հարազատ մնալու անհրաժեշտությունը, ինչպես նաև նախընթաց նախագծերի ուսումնասիրությունը և հեղինակների ընդգրկվածությունը գործընթացին:
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Հայաստանն ու Իրանն աշխատում են սահմանին երկրորդ կամրջի նախագծի վրա
Իրանի հարստացված ուրանի պաշարները միջուկային օբյեկտների փլատակներում են
Եվրամիությունը չի հասկանում Իրանում պատերազմի նպատակները. Կալաս
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...
Երևանում և մարզերում կլինեն էլեկտրաէներգիայի ընդհատումներ
Մարմնամարզության տղամարդկանց հավաքականը տուն է վերադառնում
ԱԹՍ-ի հարվածի հետևանքով Դուբայի միջազգային օդանավակայանի մոտ հրդեհ է բռնկել
Լոնդոնից գնված հայկական եկեղեցու փեղկն ու Արշիլ Գորկու գրաֆիկական աշխատանքն առաջիկա օրերին կցուցադրվ...