Թուրքիայի քանդում են քրդական շարժման խորհրդանիշերով գերեզմանները

Թուրքիայի Բաթմանի նահանգապետարանում պետության կողմից նշանակված հատուկ վերահսկիչը որոշել է քանդել 2015թ.-ի հոկտեմբերի 10-ին Անկարայում տեղի ունեցած ահաբեկչության հետևանքով զոհված բաթմանցիների գերեզմանները: Այս մասին հայտնում է թուրքական demokrathaber.or կայքը:

Վերահսկիչ Էրփուղ Շևքեթ Աքսոյի որոշման պատճառ է դարձել Բաթմանի բնակիչների կողմից զոհվածների գերեզմաններին քրդական շարժման խորհրդանիշեր և «Քուրդիստանի աշխատավորական կուսակցություն» խմբավորմանն աջակցող գրություններ փակցնելը, ինչը պաշտոնյան համարում է ահաբեկչամետ քարոզչություն:

Աքսոյը, ստորագրելով գերեզմանների քանդման հրամանը, նշել է, որ ամենաուշը փետրվարի 15-ի դրությամբ դրանք պետք է փոխարինվեն «Իսլամին հարիր» գերեզմանաքարերով:

Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:

Կազմակերպությունը 1978 թվականին հիմնադրել է Աբդուլլահ Օջալանը: