Իսրայելը կփոխի «Եվրատեսիլ 2024»-ի համար երգի տեքստը

Իսրայելական KAN հեռուստառադիոհեռարձակող ընկերությունը հայտարարել է, որ կփոխի «Եվրատեսիլ 2024» երգի մրցույթի համար ներկայացված October Rain երգի բառերը: Ըստ իսրայելական հեռարձակողի՝ առաջիկա օրերին կներկայացվի երգի տեքստի նոր տարբերակը:

Այս մասին գրում է dw.com-ը:

Իսրայելի հայտարարությունը հնչել է այն բանից հետո, երբ Եվրոպական հեռարձակողների միությունը (EBU) փետրվարի կեսերին October Rain երգի բառերը դասակարգել է որպես բացահայտ քաղաքական հայտարարություններ պարունակող, ինչն արգելված է մրցույթի կանոններով։

Երգի տեքստում կան հետևյալ տողերը՝ «Ես դեռ թաց եմ հոկտեմբերի անձրևից» և «Նրանք բոլորը, նրանցից յուրաքանչյուրը լավ երեխաներ էին», ինչը ենթադրաբար վերաբերում է 2023 թվականի հոկտեմբերի 7-ին պաղեստինյան ՀԱՄԱՍ խմբավորման կողմից Իսրայելի վրա հարձակմանը:

Ինչպես հայտնում է KAN-ը, October Rain երգը կստանա նոր անվանում՝ Hurricane: Երաժշտությունը կմնա նույնը, բայց բառերը կխմբագրվեն և կպատմեն «անձնական ճգնաժամի միջով անցնող երիտասարդ կնոջ» պատմությունը։

Սկզբում KAN-ը պաշտոնապես հայտարարել էր, որ չի փոխի October Rain երգի բառերը՝ ընդունելով հնարավոր որակազրկման ռիսկերը։ Այնուամենայնիվ, նոր հայտարարության մեջ հեռուստառադիոհեռարձակողը նշել է, որ վերանայել է իր որոշումը՝ ընդունելով Իսրայելի նախագահ Իցհակ Հերցոգի դիրքորոշումը:

Իսրայելի նախագահն ասել է, որ «այն ժամանակ, երբ մեզ ատողները փորձում են մեզ հեռացնել և բոյկոտել», Իսրայելը պետք է «բարձրացնի իր դրոշը յուրաքանչյուր համաշխարհային հարթակում»։