Ադրբեջանցի պաշտոնյան սպառնում է Հայաստանին եւ ծաղրում

Ադրբեջանի անվտանգության խորհրդի քարտուղար, գեներալ-գնդապետ Ռամիլ Ուսուբովը մտահոգություն է հայտնել Հայաստանի հետ խաղաղության պայմանագրի ստորագրման ձգձգումների կապակցությամբ։ 
Այս մասին ասվում է Ադրբեջանի Անվտանգության խորհրդի քարտուղարի՝ պաշտոնական մամուլում հրապարակված հոդվածում։

Նրա խոսքով, ամեն բաց թողնված օրը, քանի դեռ չի կնքվել խաղաղության պայմանագիր Ադրբեջանի հետ, Հայաստանին մոտեցնում է ավելի մեծ կորուստների։ Ուսուբովն ընդգծել է, որ Հայաստանն ու նրա ժողովուրդը զգալի կորուստներն են կրել ղարաբաղյան հակամարտության պատճառով։

«Քաղաքական քաոսը, տնտեսական և սոցիալական անկումը, կոռումպացված պետական ​​ապարատը, ջախջախված բանակը և խայտառակ պարտությունը, վերջապես, քաղաքացիական հակասությունները, զանգվածային արտագաղթը և հայ ժողովրդի ողբերգություններն արտացոլող այլ նմանատիպ գործոններ վկայում են այն մասին, որ Հայաստանն արդեն կանգնած է անդառնալի վերջնական փլուզման եզրին»,-նշել է Ուսուբովը։

Միևնույն ժամանակ, ԱԽ քարտուղարն ընդգծել է երկրի պատմության մեջ նոր էջ բացելու՝ հայ հասարակության կոչերը՝ ասելով, որ նման տրամադրությունները «հույս են տալիս, որ Հայաստանը դեռ կձգտի խաղաղության պայմանագրի շուտափույթ ստորագրմանը»։

Նա նաև շեշտել է Հայաստանի կողմից սահմանների դելիմիտացիայի և դեմարկացիայի գործընթացն ավարտելու անհրաժեշտությունը։ 

«Սահմանների սահմանազատման և սահմանագծման գործընթացի ավարտը, խաղաղության պայմանագրի ստորագրումն այժմ առավելապես անհրաժեշտ է Հայաստանին։ Ադրբեջանը լիովին ապահովել է իր տարածքային ամբողջականությունը, մեր սահմանները վերցվել են լիակատար վերահսկողության տակ»,- ասել է Ուսուբովը։

Նրա խոսքով, Ղարաբաղի հայ բնակիչներին տրվել է պատմական հնարավորություն՝ ստանալ Ադրբեջանի քաղաքացիություն և սկսել վերաինտեգրման գործընթացը։