«Սա հանցագործություն է լինելու մարդկության դեմ». Ռուբեն Վարդանյանը պատասխանել է Ալիևի հայտարարությանը

 Արցախի նախկին պետնախարար Ռուբեն Վարդանյանն արձագանքել է Ադրբեջանի նախագահի այն հայտարարությանը, թե «Ղարաբաղում ապրող հայերը կամ պետք է ընդունեն Ադրբեջանի քաղաքացիություն, կամ բնակության այլ վայր փնտրեն»: «Կարծում էի, որ պարոն Ալիևը լավ խորհրդականներ ունի, բայց, ինչպես երևում է այդ հայտարարություններից, դրանք բոլորովին անարժեք են։

Ես նրան խորհուրդ կտայի նրանց ազատել աշխատանքից, քանի որ որքան շատ է հնչում նման հռետորաբանությունը, որքան ավելի մռայլ է այն և որքան կոշտ է այն, այնքան մեծ են շանսերը, որ վաղ թե ուշ պարոն Ալիևը ստիպված կլինի կանգնել Հաագայի դատարանի, միջազգային տրիբունալի առջև, որովհետև ես լավ չեմ պատկերացնում, թե ինչ միջոցներով ադրբեջանական պետությունը կկարողանա իր հայրենիքից վտարել 120 հազար հայերի։ Ամեն դեպքում, դա հանցագործություն է լինելու մարդկության դեմ և ուժի լեզվով, որքան շատ են ճնշումներ գործադրվում Արցախի վրա, այնքան ամուր են նրանք համախմբվում և կանգնում միմյանց կողքին: Այդ իմաստով, ինձ թվում է, ոչ մի տեղ տանող ճանապարհ է», – Business FM-ի հետ զրույցում ասել է Վարդանյանը։

Նա ընդգծել է, որ միակ ճանապարհը միջազգային հարթակում բանակցությունների անցկացումն է, որի շրջանակներում Բաքուն պետք է ճանաչի Արցախի պետությունը: «Այս տեսանկյունից ես ասել եմ և կասեմ, որ միակ ճանապարհը նորմալ բանակցությունների ճանապարհն է, որտեղ Ադրբեջանը պետք է ճանաչի մյուս կողմին, այն է՝ Արցախյան պետությանը, Արցախի ընտրված առաջնորդներին, և միջազգային հարթակում պետք է նորմալ բանակցություններ ընթանան՝ հասկանալով, որ այլ կերպ դա ոչ մի տեղ տանող ճանապարհ է», — Ռուբեն Վարդանյանի խոսքերն է մեջբերում պարբերականը:

Ավելի վաղ Ադրբեջանի նախագահ Իլհամ Ալիևը հայտարարել էր, որ «Ղարաբաղում ապրող հայերը կամ պետք է ընդունեն Ադրբեջանի քաղաքացիություն, կամ բնակության այլ վայր փնտրեն»: Ալիևը նաև հայտարարել է, որ Հայաստանը «պետք է պաշտոնապես հայտարարի, որ Ղարաբաղն Ադրբեջան է»:

ՀՀ վարչապետ Նիկոլ Փաշինյանը նույն օրը հայտարարեց, որ Հայաստանը լիարժեքորեն ճանաչում է Ադրբեջանի տարածքային ամբողջականությունը: «Մենք ակնկալում ենք, որ Ադրբեջանը նույնը կանի՝ Հայկական ԽՍՀ ամբողջ տարածքը ճանաչելով որպես Հայաստանի տարածք», – ասել է վարչապետը: