Փաշինյանը բացահայտ հայտարարում է՝ դեմ չէ, որ Արցախը լինի Ադրբեջանի կազմում․ Իշխան Սաղաթելյան

Նիկոլ Փաշինյանը բացահայտ հայտարարում է, որ դեմ չէ, որ Արցախը լինի Ադրբեջանի կազմում, այս մասին «Դիմադրություն» շարժման երթի ավարտին Ֆրանսիայի հրապարակում հայտարարեց ԱԺ փոխնախագահ Իշխան Սաղաթելյանը։

«Նախօրեին խորհրդարանում Նիկոլ Փաշինյանը հայտարարեց, որ ցանկացած կարգավիճակ, որը կերաշխավորի արցախահայության անվտանգությունը, մեզ համար ընդունելի է։ Մարդը բացահայտ հայտարարում է, որ դեմ չէ, որ Արցախը լինի Ադրբեջանի կազմում»,- ասաց նա։

Իշխան Սաղաթելյանը նշեց, որ Փաշինյանի հայտարարության պատասխանը այսօր հնչեցրեց Ադրբեջանի նախագահ Իլհամ Ալիևը, որն ասել է, որ Փաշինյանի հետ «ունի պայմանավորվածություն, որ չխոսվի Արցախի կարգավիճակի մասին»։

«Երբ ամիսներ շարունակ ասում էինք, որ Ալիևը և Նիկոլը ունեն պայմանավորվածություն՝ երկիրը կտոր-կտոր հանձնելու, դեռ կային մարդիկ, որոնք ասում էին, թե դա այդպես չէ։ Կարծում եմ՝ գոնե այսօրվանից հետո բոլոր այն մարդիկ, ովքեր ինչ-ինչ հանգամանքներից ելնելով՝ դեռ ջրբաժանի այդ հատվածում են, պետք է հասկանան, որ դավաճանի հետ հավասար պատասխանատվություն են կրելու»,- հայտարարեց Իշխան Սաղաթելյանը։

Հիշեցնենք, որ Բաքվում ընթացող «Գլոբալ աշխարհակարգին սպառնացող վտանգները» թեմայով ֆորումի ժամանակ Ադրբեջանի նախագահ Իլհամ Ալիեւն այսօր հայտարարել է, որ առանց «Զանգեզուրի միջանցքի» բացման շատ դժվար կլինի խոսել խաղաղության մասին։ Նա նշել է՝ եթե «Զանգեզուրի միջանցքը» չբացվի, ապա Հայաստանի հետ նորմալ համակեցությանն ուղղված Ադրբեջանի բոլոր ջանքերն ապարդյուն կլինեն։ Ալիևը նաև ասել է, որ եթե Հայաստանը Ղարաբաղի հայերի համար կարգավիճակ պահանջի, ապա Ադրբեջանը ստիպված կլինի Արեւմտյան Զանգեզուրում ադրբեջանցիների համար կարգավիճակ պահանջել, քանզի, ըստ նրա՝ այդ տարածքը ժամանակին ադրբեջանցիներով է բնակեցված եղել։ Ադրբեջանի նախագահը նաև սպառնացել է՝ ասելով, որ Հայաստանի կառավարությունը չպետք է մոռանա Ղարաբաղյան երկրորդ պատերազմի դասերը եւ հրաժարվի Ադրբեջանի նկատմամբ տարածքային ցանկացած պահանջից։