Քաղաքացիները աղբամաններով փակել էին Բաղրամյան պողոտան. Այստեղ է «Սիսական» ջոկատի հրմանատար Աշոտ Մինասյանը

Նիկոլ Փաշինյանի հրաժարականի պահանջով այսօր՝ մայիսի 4-ի առավոտյան քաղաքացիները փակել էին Երևանի Բաղրամյան պողոտան։ Նրանք աղբամանները բերել են փողոցի կենտրոն ու իրենք էլ կանգնել մեջտեղում՝ վանկարկելով «Նիկոլ, դավաճան»։

Ակցիայի վայր ժամանած մեծաթիվ ոստիկանները 5 րոպե ժամանակ տվեցին պողոտան ազատելու համար, ապա սկսեցին ուժ կիրառելով ազատել ճանապարհը: Այստեղ է նաեւ Սիսական ջոկատի հրամանատար Աշոտ Մինասյանը:

Ոստիկանները նաեւ բերման ենթարկեցին ակցիայի մմասնակիցներից մի քանիսին, եւ ի վերջո բացեցին պողոտան:

Նշենք, որ այսօր վաղ առավոտից քաղաքացիները կրկին կաթվածահար են արել մայրաքաղաքի մի շարք փողոցներ։ Ոստիկանները ակցիայի մասնակիցներին բերման են ենթարկում՝ բռնի ուժ կիրառելով։ Նախօրեին ճանապարհներ են փակվել նաեւ մարզերում, մասնավորապես, փակվել է Սեւան-Երեւան, Վանաձոր-Երեւան, Գյումրի-Երեւան, նաեւ Գորիսից Երեւան եկող ճանապարհները:

Ավելի վաղ NEWS.am-ը հայտնել էր, որ մայիսի 2-ից խաղաղ անհնազանդության ակցիաներ են սկսվել Երեւանում, փակվել են մի շարք փողոցներ: Մարտի 2-ից Երևանի Ֆրանսիայի հրապարակում հանրահավաքներ են իրականացվում։

Երեկվա հանրահավաքում ՀՅԴ ԳՄ անդամ, ԱԺ փոխնախագահ Իշխան Սաղաթելյանը հայտարարեց, մայիսի 4-ին վաղ առավոտից շարունակվում են բողոքի ակցիաները, որոնք կշարունակվեն մինչև ժամը 14։00-ն։ Այնուհետև ժամը 15․30-ին նախատեսված է հանրահավաք Ֆրանսիայի հրապարակում։