ԶԼՄ. ԵՄ-ն կարող է Ռուսաստանը ներառել այսպես կոչված հարկային ապաստարանների գորշ ցուցակում
ԵՄ-ն կարող է Ռուսաստանը ներառել այսպես կոչված հարկային ապաստարանների գորշ ցուցակում, հայտնում է EUobserver-ը՝ վկայակոչելով փաստաթղթի նախագիծը։ Գորշ ցուցակը սովորաբար ներառում է «վնասակար» հարկային ռեժիմ ունեցող երկրներ։ Ռուսաստանի դեպքում ԵՄ-ի դժգոհությունն առաջացրել են հատուկ վարչական շրջանները (այսպես կոչված՝ «ռուսական օֆշորներ»)։
Ցուցակում կարող են լինել նաեւ Իսրայելը, Բերմուդյան կղզիները, բրիտանական Վիրջինյան կղզիները եւ այլն: Այս ցուցակում ընդգրկված երկրների ընդհանուր թիվը պետք է ընդլայնվի 15-ից մինչեւ 25: Նրանց հետ գործարքները կենթարկվեն հատուկ մոնիթորինգի, գրում է «Կոմերսանտ»-ը:
ԵՄ-ն կարծում է, որ նման պետությունները լիովին չեն համապատասխանում միջազգային հարկային չափանիշներին, սակայն պատրաստ են համագործակցել եւ բավարար պարտավորություններ են ստանձնել հետագա բարեփոխումների համար։ ԵՄ նախարարները փետրվարի 24-ին պետք է որոշեն ընդլայնել գորշ ցուցակը։
Ռուսաստանի կառավարությունը քննարկում է այս որոշման հնարավոր հետեւանքները։
«Վեդոմոստի»-ն՝ վկայակոչելով կառավարությանը մոտ կանգնած աղբյուրը, հայտնել է, որ Եվրախորհուրդը Ռուսաստանը կներառի «ոչ կոոպերատիվ երկրների» (non-cooperative jurisdictions) ցուցակի երկրորդ խմբում։ Երկրորդ խումբը` Annex II, այսպես կոչված գորշ ցուցակն է: Առաջինը` Annex I-ը, ենթադրում է սեւ ցուցակում ներառում։ Սեւ ցուցակում հայտնվածներն ավելի կոշտ հարկային հսկողության կենթարկվեն։ Եթե երկիրը կատարում է իր պարտավորությունները ԵՄ-ի հանդեպ, ապա դուրս է գալիս ցուցակից։
2021 թվականի հունիսին ԵՄ խորհուրդն իր զեկույցում ռուսական հատուկ վարչական շրջաններն անվանել է «վնասակար» հարկային ռեժիմ (harmful tax regime)։ ԵՄ-ն կարծում է, որ «ռուսական օֆշորները» ստեղծում են անբարեխիղճ հարկային մրցակցություն։ ԵՄ-ն երկու պահանջ է առաջադրել՝ պարտավորեցնել ընկերություններին հատուկ վարչական շրջաններ տեղափոխվելիս գրասենյակներ բացել, ինչպես նաեւ ռեժիմը հասանելի դարձնել ռուսական հոլդինգների համար։ Ռուսաստանը պետք է փոփոխի օրենսդրությունը մինչեւ 2022 թվականի դեկտեմբերի 31-ը, նշել է «Վեդոմոստի»-ի աղբյուրներից մեկը։
Ֆինանսների փոխնախարար Ալեքսեյ Սազանովն անցյալ տարի ասել է, որ 2022 թվականի առաջին եռամսյակում նախատեսվում է փոխզիջման հասնել ԵՄ-ի հետ։ Փոխնախարարը պարզաբանել է, որ ֆինանսների նախարարությունը համաձայնել է ԵՄ-ի առաջին պահանջին, իսկ երկրորդի շուրջ բանակցություններ են սկսվել։
Ի սկզբանե «ռուսական օֆշորները» ստեղծվել են ռուսական արմատներով օտարերկրյա ընկերությունների համար, այս միջոցն ուղղված էր ռուսական արդարադատությանը նրանց վերադարձին։ 2021 թվականի հուլիսին էկոնոմիկայի նախարարությունն օրինագծերի փաթեթ է պատրաստել՝ բարձրացնելու ռուսական հատուկ վարչական շրջանների գրավչությունը։ Փոփոխությունների համաձայն՝ 2020 թվականի սկզբից ոչ ուշ (այժմ՝ 2018թ.) գրանցված երիտասարդ ընկերությունները նույնպես կկարողանան «տեղափոխվել» հատուկ վարչական շրջաններ։ Բացի այդ, այդ շրջաններ հնարավոր կլինի փոխանցել առնվազն 5 միլիարդ ռուբլու չափով ակտիվներ ունեցող օտարերկրյա քաղաքացիների միջազգային անձնական հիմնադրամները։ Սակայն ներդրողները ռիսկեր են տեսնում ռուսական ընկերությունների «տեղափոխման» մեջ։