Կիմ Չեն Ընի անհետացած կինը հայտնվել է հանրության առջեւ

Հյուսիսային Կորեայի առաջնորդ Կիմ Չեն Ընի կինը ՝ Լի Սոլ Ջուն, որն ավելի վաղ անհետացել էր լրագրողների տեսադաշտից, հայտնվել է հանրության առջեւ, հաղորդում Է Reuters-ը:

Գործակալության տվյալներով՝ քաղաքական գործչի կինը հայտնվել է վերջին հինգ ամիսների ընթացքում առաջին անգամ։ Կիմ Չեն Ընի հետ միասին նա ներկա է գտնվել Փհենյանի Մանսուդեի գեղարվեստական թատրոնում՝ լուսնային օրացույցով Նոր տարվա տոնակատարությանը նվիրված ներկայացմանը։

Զույգին ուղեկցել է նաեւ Հյուսիսային Կորեայի առաջնորդի հորաքույր Կիմ Հյոն Հին՝ ԿԺԴՀ-ի հիմնադիր Կիմ Իր Սենի դուստրը, որը հազվադեպ է հայտնվում հանրության առջեւ նրա ամուսնուն՝ Չան Սոն Թհեքին, կոռուպցիայի եւ անառակ ապրելակերպի մեղադրանքով 2013 թվականին մահապատժի ենթարկելուց հետո: Նշվում է, որ երկու կանայք հագել են ավանդական կորեական հագուստ՝ հանբոկ, եւ նստել են կողք կողքի։

Մինչ այդ Լի Սոլ Ջուն հայտնվել է 2021 թվականի սեպտեմբերի սկզբին․ այն ժամանակ նա մասնակցել էր ԿԺԴՀ-ի հիմնադրման տարեդարձի միջոցառումներին եւ ամուսնու հետ այցելել Կիմ Իր Սենի եւ Կիմ Չեն Իրի դամբարան:

Ընդ որում, ավելի վաղ, ինչպես նշում Է Reuters-ը, Լի Սոլ Ջուն Կիմ Չեն Ընին հաճախ ուղեկցել է աշխարհիկ եւ ռազմական միջոցառումների, ինչպես նաեւ գործնական ուղեւորությունների ժամանակ: Երկու տարի առաջ նա անհետացել է եւ հայտնվել միայն 2021-ի փետրվարին: Այն ժամանակ լրագրողները ենթադրում էին, որ քաղաքական գործչի կնոջ նման երկարատև բացակայությունը կարող էր կապված լինել նրա հղիության հետ։

Կիմ Հյոն Հիի համար այս հայտնվելը 2020 թվականի հունվարից ի վեր առաջինն էր։ Նա ԿԺԴՀ-ում առանցքային դեմքերից մեկն էր համարվում Կիմ Չեն Ընի իշխանության տարիներին, սակայն ամուսնու մահապատժից հետո վեց տարով կորել է: Հարավային Կորեայի ազգային հետախուզական ծառայությունը 2017 թվականին հայտնել է, որ Կիմ Հյոն Հին բուժվում է Փհենյանի սահմաններից դուրս, սակայն նրա հիվանդության մասին ստույգ տեղեկատվություն չի ստացվել։