Գերմանիայում կաթոլիկ եկեղեցու ներկայացուցիչները կոլեկտիվ քամինգ աութ են արել

Աննախադեպ կոլեկտիվ ակցիայի ժամանակ Գերմանիայում կաթոլիկ եկեղեցու 125 ներկայացուցիչ հրապարակավ հայտարարել է քուիր համայնքին իրենց պատկանելության մասին՝ պահանջելով փոխել եկեղեցական աշխատանքային օրենսդրությունը, հայտնում է dpa-ն։ Նրանք նաեւ խրախուսել են մյուս կաթոլիկներին միանալ #OutInChurch նախաձեռնությանը:

Ինչպես նշվում է հաղորդագրության մեջ, ԼԳԲՏՔ+-ին իրենց պատկանելության մասին հայտնածների թվում կան քահանաներ, հովիվ-ռեֆերենտներ եւ կաթոլիկ համայնքների առաջնորդներ, կրոնական դպրոցների ուսուցիչներ եւ ուսուցչուհիներ, եկեղեցական ադմինիստրացիայի աշխատակիցներ եւ աշխատակիցուհիներ:

Ակցիային մասնակցողների պահանջների համաձայն՝ կաթոլիկ եկեղեցին պետք է դադարեցնի սեռական կողմնորոշումն ու գենդերային ինքնությունը որպես աշխատանքից ազատման պատճառ օգտագործելը, բացի այդ, եկեղեցական ուսուցումից պետք է բացառվեն սեռի եւ սեռականության վերաբերյալ զրպարտչական արտահայտությունները։

Ըստ քահանա Բյորնդ Մյոնկեբյուշերի, ով 2021 թվականին նախաձեռնել էր միասեռական զույգերի օրհնությունը, եկեղեցական միջավայրում ակցիան ոգեշնչված էր անցյալ տարվա օրինակով, երբ 185 գերմանացի դերասաններ եւ դերասանուհիներ պատմեցին, որ իրենք գեյ, լեսբուհի կամ բիսեքսուալ են: