Հայաստանի հավաքականը շարունակում է միավորներ բաժանել

Ֆուտբոլի Հայաստանի հավաքականը աշխարհի առաջնության ընտրական փուլի շրջանակներում Ռեյկյավիկում մրցեց Իսլանդիայի ընտրանում հետ եւ խաղն ավարտեց 1:1 հաշվով, չնայած մինչեւ 77-րդ րոպեն խաղը շահում էր 1:0 հաշվով:

Գոլը մեր հավաքականի կազմում Սելարայանի փոխանցումից հետո առաջին խաղակեսի վերջնամասում խփեց Կամո Հովհաննիսյանը:

Այս խաղի սցենարը հիշեցրեց Հայաստան-Լիխտենշտեյն հանդիպումը: Այդ խաղում եւս մեր հավաքականը հաղթում էր, ուներ առավելություն, սակայն խաղավերջում անակնկալ գոլ բաց թողեց:

Հայաստան-Իսլանդիա հանդիպմանը զուգահեռ ընթանում էր Գերմանիա-Ռումինիա եւ Լիխտենշտեյն-Հյուսիսային Մակեդոնիա հանդիպումները: գերմանացիներն ու հյուսիսմակեդոնացիները հաղթեցին եւ մեր թիմը հիմա արդեն երկրորդ տեղը 12 միավորով կիսում է Հյուսիսային Մակեդոնիայի հետ, որը երեք օրից տանը մրցելու է Գերմանիայի հետ:

Հայաստանի ընտրանին Բուխարեստում մրցելու է ռումինների հետ, եւ եթե ցանկանում է գրավել երկրորդ տեղը, պետք է գոնե չպարտվի:

Առաջին տեղը խմբում 16 միավորով Գերմանիան է:

Top-News.am