Բունդեսթագի ընտրություններում առաջատարը սոցիալ-դեմոկրատներն են
Բունդեսթագի՝ Գերմանիայի խորհրդարանի ստորին պալատի ընտրությունների բոլոր ձայները հաշվված են: Բունդեսթագում տեղերի մեծ մասը, ըստ նախնական տվյալների, կզբաղեցնեն սոցիալ-դեմոկրատները՝ 735-ից՝ 206-ը: Սոցիալ-դեմոկրատները հավաքել են ձայների ավելի քան 25%-ը և զգալիորեն մեծացրել իրենց ներկայացվածությունը:
Երկրորդ տեղում Քրիստոնեա-դեմոկրատական միության և Քրիստոնեա-սոցիալական միության դաշինքն է, որը ստացել է 196 մանդատ և կուսակցական ցուցակներով ձայների ավելի քան 24%-ը: Սա պատմության մեջ ամենացածր արդյունքն է:
Այս երկու կուսակցություններն էլ կազմում են Գերմանիայի ներկայիս կառավարությունը: Ընտրությունների արդյունքներից ակնհայտ է, որ նոր կառավարությունը նույնպես լինելու է կոալիցիոն, սակայն վերլուծաբանները կարծում են, որ այսպես կոչված «մեծ կոալիցիայի» պահպանումը քիչ է հավանական: Հնարավոր կոալիցիաներից վերլուծաբանները նշում են «Լուսացույց»-ը (Սոցիալ դեմոկրատներ-Կանաչներ-Ազատ դեմոկրատներ) և «Ջամայկա»-ն (Քրիստոնեա-դեմոկրատական միության և Քրիստոնեա-սոցիալական միության դաշինք-Կանաչներ-Ազատ դեմոկրատներ): Սոցիալ-դեմոկրատների ղեկավար Օլաֆ Շոլցի կանցլեր դառնալու շանսերն ավելի հավանական են թվում:
Բունդեսթագում, ընդհանուր առմամբ, ներկայացված կլինի 6 կուսակցություն, ինչպես և հիմա: Կանաչների (ձայների 14.8%-ը, 118 տեղ) և Ազատ դեմոկրատների (ավելի քան 11%, 92 տեղ) ներկայացվածությունն աճել է, «Այլընտրանք Գերմանիայի համար»-ինը (10%, 83 տեղ) և «Ձախեր»-ինը (4.9%, 39 տեղ. չհաղթահարելով 5%-ի շեմը, կուսակցությունն անցել է խորհրդարան՝ միամանդատ ընտրատարածքներում տարած հաղթանակի շնորհիվ)՝ նվազել:
2021թ.-ի ընտրությունների արդյունքներով, 16 տարվա ընթացքում առաջին անգամ, կառավարությունը կձևավորվի առանց ներկայիս կանցլեր Անգելա Մերկելի: 67-ամյա քաղաքական գործիչը կարիերայի ավարտի մասին հայտարարել է դեռ 2018թ.-ին: