Լավրով. Ռուսաստանը սիրով կմասնակցի Աֆղանստանի նոր կառավարության կազմի հայտարարման արարողությանը
Ռուսաստանը հաճույքով կմասնակցի Աֆղանստանի նոր կառավարության կազմի հայտարարման արարողությանը, եթե այն ներառական լինի: Այս մասին լրագրողներին ասել է Ռուսաստանի արտգործնախարար Սերգեյ Լավրովը, փոխանցում է ՏԱՍՍ -ը:
«Մենք ցանկանում ենք աջակցել կառավարության ձեւավորման գործընթացին, որը կարտացոլի աֆղանական հասարակության ողջ սպեկտրը, այդ թվում՝ թալիբներին եւ այլ էթնիկ խմբերին, ոչ միայն փուշթուներին, այլեւ՝ ուզբեկներին, հազարներին, տաջիկներին: Միայն այդպիսի ներառական կառավարությունը կարող է ապահովել կայուն անցում դեպի նոր կյանք: Եթե դրա մասին խոսք լինի, ես կարծում եմ, որ մենք հաճույքով կմասնակցենք նման արարողությանը հրավիրված այլ երկրների հետ, որոնք ազդում են այս երկրում իրավիճակի վրա»,- ասել է նա:
Թալիբների ներկայացուցիչը «Ալ Ջազիրա» հեռուստաընկերությանն ասել է, որ թալիբները հրավիրել են Ռուսաստանին, ինչպես նաեւ Թուրքիային, Չինաստանին, Իրանին, Պակիստանին եւ Քաթարին`մասնակցելու Աֆղանստանի նոր կառավարության կազմի հայտարարմանը նվիրված միջոցառմանը: