Եվրասիական բանկը ցանկանում է դառնալ Հայաստանի տնտեսության խոշորագույն վարկատուներից մեկը

Եվրասիական զարգացման բանկը ցանկանում է իր մասնաբաժինը Հայաստանի ներդրումային պորտֆելում հասցնել մինչեւ 15 տոկոս։ Այս մասին ասվում է 2022-26 թթ․ բանկի ռազմավարության մեջ։ 5 տարում բանկը մտադիր է մեծացնել մասնակից երկրներում նախագծերի ծավալը 2,7 անգամ՝ այն հասցնելով մինչեւ 10,9 մլրդ դոլարի։

Ընդ որում, ուշադրություն կհատկացվի ոչ մեծ երկրներին․ Հայաստանում, Ղրղզստանում եւ Տաջիկստանում ներդրումների համատեղ ծավալը կհասնի 500 մլն դոլարի կամ 4 անգամ ավելի շատ, քան 2020-ին։ Այդ երկրներում ֆինանսավորումը ծրագրվում է անցկացնել գերազանցապես եվրոյով եւ դոլարով, սակայն բանկը պատրաստ է վարկ տրամադրել նաեւ այդ երկրների ազգային արժույթով։

Դրա համար բանկը կհավաքի ազգային արժույթով ռեզերվները՝ ցանկանալով դրանց ծավալը 2026-ին հասցնել մինչեւ 35 տոկոս։ Բանկը մտադիր է ազգային արժույթով միջոցներ ներգրավել նաեւ մասնակից երկրների ֆինանսական շուկաներից, ինչպես նաեւ արժութային սվոփերի միջոցով։ Բացի այդ, բանկը մտադիր է դառնալ երեք խոշոր ներդրումային նախագծերի ֆինանսավորման հիմնական մասնակից։ Դրա համար կհատկացվի մոտ 1,2 մլրդ դոլար։ Այդ նախագծերից մեկը կապված է «Եվրոպա-Արեւմտյան Չինաստան» երկաթուղու ընդլայնման հետ։ Մեկ այլ նախագիծ է Եվրասիական բանկի երկրների ապրանքների տեղափոխման համար միասնական ենթակառուցվածքը , մեկ այլ ծրագիր է հիդրոէներգետիկայի հզորության մեծացումը։ Հիշեցնենք, որ Եվրասիական զարգացման բանկում մասնակցում են Հայաստանը, Բելառուսը, Ղրղզստանը, Ռուսաստանն ու Տաջիկստանը։