Բայդենը հարգանքի տուրք կմատուցի Աֆղանստանում զոհված ամերիկացի զինծառայողներին
ԱՄՆ նախագահ Ջո Բայդենը մեկնել է Դովեր ռազմաօդային բազա հարգանքի տուրք մատուցելու ԱՄՆ զինծառայողների հիշատակին, որոնք զոհվել են անցած շաբաթ Քաբուլի օդանավակայանից քաղաքացիական անձանց տարհանելու ժամանակ մահապարտի ռումբի պայթյունի հետեւանքով, հաղորդում է Associated Press-ը:
Պայթյունի հետեւանքով, որը հինգշաբթի իրագործել էր «Իսլամական պետության» մահապարտ ահաբեկիչը Քաբուլի օդանավակայանի մերձակայքում, զոհվել են տանյակ աֆղանցիներ եւ 13 ամերիկացի զինծառայող:
Սպիտակ տան հայտարարության համաձայն՝ Բայդենն ու նրա տիկին Ջիլը կհանդիպեն հարձակման հետեւանքով զոհված զինծառայողների ընտանիքների հետ:
Բայդենը խոստացել է պատժել օդանավակայանում պայթյունի մեղավորներին: Շաբաթ ամերիկացի զինվորականները հայտարարել են, որ նրանք սպանել են ԻՊ երկու ահաբեկիչներին Աֆղանստանում անօդաչուի հարձակման հետեւանքով: