Որդու պոռնոֆիլմերը նետած ծնողները նրան ավելի քան 40 հազար դոլար կվճարեն

Միչիգանի դատավորը ամուսնական զույգին պարտավորեցրել է իրենց որդուն 30 441 դոլար վճարել՝ պոռնոգրաֆիայի նրա հավաքածուն դեն նետելու համար, հաղորդում է The Guardian-ը:

43-ամյա Դեւիդ Վերքինգի խոսքով՝ ինքն ամուսնալուծությունից հետո 10 ամիս ապրել է ծնողների տանը, այնուհետեւ տեղափոխվել է Մանսի: Տեղափոխությունից հետո տղամարդը հայտնաբերել է, որ իր ֆիլմերի եւ ամսագրերի հավաքածուն չկա: «Անկեղծ ասած, Դեւիդ, ես քեզ մեծ լավություն եմ արել՝ ազատելով այդ անպետք իրերից»,- էլեկտրոնային նամակում ասել է տուժածի հայրը։

Հավաքածուի արժեքը որոշելու համար կատարվել է փորձաքննություն: Բացի այդ, ամուսինները պետք է փոխհատուցեն Դեւիդի փաստաբանի ծախսերը՝ 14 500 դոլարի չափով: Ընդհանուր առմամբ, վճարումների չափը կկազմի ավելի քան 40 հազար դոլար: Որոշումը կայացնելիս շրջանային դատավոր Փոլ Մելոնին նշել է, որ զույգը չի կարողացել հաստատել ուրիշի ունեցվածքը ոչնչացնելու օրինականությունը, որն իրենց դուր չի եկել: