ԱՄՆ-ում մահացել է «Օբամայի ամենամեծ աջակիցը», որի հասակը 235 սմ էր
Մինեսոտա նահանգի Ռոչեսթեր քաղաքում մահացել է ուկրաինական ծագումով հսկա դերասան Իգոր Վովկովինսկին: Նա 38 տարեկան էր, հայտնում է USA Today-ը:
«Նրա վերջին ուտելիքը «Կիեւյան» տորթն էր եւ ֆանտան»,- Facebook-ի իր էջում գրել է դերասանի մայրը:
Ուկրաինական ԽՍՀ-ում ծնված Իգորի ընտանիքը 1989-ին տեղափոխվել է ԱՄՆ՝ նրա քաղցկեղը բուժելու համար, որի պատճառով լրջորեն վնասված էր տղայի հիպոֆիզը՝ ուղեղի այն հատվածը, որը պատասխանատու է նաեւ հասակի համար: Հիվանդության պատճառով նա հասել էր 235 սանտիմետրի: Նա ճանաչվել է ԱՄՆ-ի ամենաբարձրահասակ մարդը:
Իգորը հայտնի էր դարձել այն բանից հետո, երբ 2009-ին ԱՄՆ նախկին նախագահ Բարաք Օբաման ուշադրություն էր դարձրել «Օբամայի ամենամեծ աջակից» գրությամբ շապիկով հսկայի վրա: Այս դրվագը Վովկովինսկուն հայտնի էր դարձրել ինչպես ԱՄՆ-ում, այնպես էլ նրա պատմական հայրենիքում` Ուկրաինայում: