Չեխիայի նախագահը կոչ է արել չանել հապճեպ եզրակացություններ եւ սպասել «Վրբետիցեի գործով» հետաքննության արդյունքներին
Չեխիայի նախագահ Միլոշ Զեմանը հայտարարություն է տարածել «Վրբետիցեի գործի» շուրջ՝ կոչ անելով սպասել հետաքննության արդյունքներին, հաղորդում է ՌԻԱ Նովոստի-ն:
Հայտարարության մեջ Զեմանը չի բացառել, որ Վրբետիցեում 2014 թվականին տեղի ունեցած պայթյունի հնարավոր պատճառներից մեկը, որի հետեւանքով զոհվել էր երկու մարդ, ռազմամթերքի հետ անզգույշ վերաբերմունքն էր: Նա կոչ է արել սպասել պայթյունի մասին հետաքննության արդյունքներին նախքան եզրակացություններ անելը: Զեմանը հրավիրել է ուշադրությունն առ այն, որ հակահետախուզությունը 6 տարվա ընթացքում չի հիշատակել ռուս գործակալներին անգամ զեկույցի փակ մասում: Չեխիայի նախագահը նաեւ հայտարարել է, որ լիովին վստահում է ոստիկանությանն ու գլխավոր դատախազությանը, որոնք աշխատում են Վրբետիցեում պայթյունների հետաքննության շուրջ: