Հերոս տղերքի ներկայությունը եւ Հայաստանի հավաքականի տպավորիչ հաղթանակը (Լուսանկարներ)

Պատմության մեջ առաջին անգամ ֆուտբոլի Հայաստանի ազգային հավաքականը աշխարհի առաջնության ընտրական փուլի առաջին երկու խաղերից հետո վաստակել է վեց միավոր:

Այսօր, մեր հավաքականի ֆաները Արցախյան երկրորդ պատերազմում զոհված իրենց ընկերների մեծադիր լուսանկարները փակցրել էին Վազգեն Սարգսյանի անվան հանրապետական մարզադաշտում: Աբգարը, Հայկազը, մյուս տղերքը ներկա էին խաղին եւ իրենց ոգեղեն ուժով այնպիսի մթնոլորտ ստեղծեցին, որ հավաքականը տպավորիչ խաղով 2:0 հաշվով հաղթեց ուժեղ Իսլանդիայի հավաքականին:

Երկու գեղեցիկ գոլ Տիգրան Բարսեղյանի եւ Խորեն Բայրամյանի կատարմամբ: Հիանալի մարզիչ Խոակին Կապարոս եւ կարգապահ խաղ:

Աղյուսակին նայելն անգամ մի տեսակ անսովոր է: Հայաստանի եւ Գերմանիայի հավաքականները վեցական միավորով գլխավորում են այն:

Գերմանացիներն այսօր Ռումինիայում 1:0 հաշվով հաղթեցին տեղի հավաքականին:

Ռումինացիները երեք միավորով երրորդ տեղն են կիսում հյուսիսմակեդոնացիների հետ, որոնք 5:0 հաշվով հաղթեցին Լիխտենշտեյնին:

Իսլանդիան եւ Լիխտենշտեյնը դեռ միավոր չունեն:

Մարտի 31-ին Հայաստանի ազգային թիմը կընդունի Ռումինիայի հավաքականին: